داننـــ ــ ــــ ــي.. والجـ ـ ـرم حـ ـ ـ ـبـ ـ ـ ـ ـ ـ ـ ـ ـ ـ ـ ــه .......

داننـــ ــ ــــ ــي.. والجـ ـ ـرم حـ ـ ـ ـبـ ـ ـ ـ ـ ـ ـ ـ ـ ـ ـ ــه .......



حبيت أنزل لكم هاي القصه لأنها صدق عيبتي

بنزل كل أسبوع باارت


القصه : دانني والجرم حبه
للكاتبه : عذبه السجايا


--------------------------------------------------------------------------------

x | الجزء الأول |x


محمد: ليش كلفتي على عمرج يا بنتيه؟؟!!
حصه: لا كلافه ولا شي...بويه الغالي..ما شوفه الا فالسنه حسنه..كيف ما تباني اخدمك..
محمد: هههههههههه....جان خليتي الخدامه اتسويه..
حصه: ماحد عندنا غير لي لي...و الاندونيسيه اليديده..و انته تعرفها لي لي..ما أيسر أيرّ النصخ جدامها..و الاندونيسيه ما أثق فيها..
محمد و هو ايهز راسه: ههههههههههههه....لحظة صمت...الحص غناتي؟
حصه: لبيه الوالد..
محمد: شوه أقولج يا بنتيه...فيه أستشاري يديد ياي زياره فالمستشفى العسكري..ما تبينا نعرض عليه حالتج؟
حصه و كل ملامح الكآبه على ويهها: بويه...ردينا علي طير يلي...خلاص بس..أنا راضيه باللي كاتبنه الله..ماروم كل يوم كل يوم اشوف دكتور و ايقولي مالج أمل..تراني عايشه و راضيه بحاليه..
محمد: بس بنتيه..انتي اتشوفين حالج شقايل..عازله عمرج عن العرب..ما تطلعين ما تسيرين ما تيين..حتى الجامعه طلعتي منها..أبالج الزين يا بنتيه...
حصه: أنا جذيه مرتاحه...و عمليه و ما بسويها..
محمد: اللي يريحج..بس مب معناها انه الموضوع انتهى..فكري فالموضوع زين..ولا تستعيلين..
محمد و بهمس: حصه؟؟
حصه و هي ترفع عيونها الناعسات: نعم..
محمد: أمج أهنيه؟؟!!
حصه و هي اتنزل راسها: هيه...يوم تيي أنته فجأه..ما بتحصل هيه حجه عشان تتهرب منك..
محمد بتنهيده: ليت كل شي يرد شرات لوّل
غريسه و هي أتفج الباب بقوه..و تدخل بهاذيج المشيه الملوكيه..كانت ملكه..بجمالها..بجاذبيتها..بطـّـلتها اللي ما تعطيك الفرصه انك اتنزل العين عنها..رغم سنوات عمرها الست و ثلاثين..إلا انك ما تروم اتقول شي عنها ...ألا ملكه بالزين و الجمال...
غريسه و هي تيلس في طرف البعيد من الميلس: شوه هو اللي بيرد شرات لوّل يا محمد؟؟!!
محمد و هو يوقف: مرحبا غريسه شحالج؟
غريسه: بخير يعلك الخير و من صوبك؟
محمد: ما نشكي باس الحمدلله..محمد و هو يحاول يخفف من التوتر..عيل وين ظبي بوظبي؟؟!!
حصه: فالبول عند ربيعاتها...قلت حق لي لي اتخبرها انك اهنيه..
محمد: قوليلها تظهر بسرعه...انا مستعيل..
حصه : إن شالله..
ثواني وأنه اليازيه داخله الميلس..
محمد و هو يوقف عشان ايسلم على اليازيه: مرحبا الساااع...مرحبا مرحبا...بظبي بوظبي...
اليازيه: مرحبا بابا...شحالك؟
محمد: الحمدلله و انتي شحالج..ماشالله ماشالله انتي كل ما أييلج تطولين..بس عاد وقفي شوي، استويتي طولي
اليازيه: الطول هيبه...أحسن علاقل عن بعض الناس...
نزلت حصه راسها في هاللحظه..لانها عرفت انه اليازيه تقصدها هيه..
غريسه و بحزم: بس اليازيه...هاذي...أختج...علاقل احترميها جدامنا..
اليازيه و بإستهزاء: انزين انا ما قلت الا الحقيقه...و الله...!!!!
محمد و هو يلتفت صوب حصه: لا لا لا...عاد خلي عنج يا اليازي...فالزين و الحلاه الحص تغلبج...
اليازيه: لا و اللللللللللللللله.....بس عاد بابا...اذا على الطول و الجسم تراني اغسلها غسال..انا تقارنوني بهالعريا؟؟!!!!
نشت حصه في هاللحظه و الدموع تلمع في عيونها
محمد و بصوت حاد: بس عااد اليازيه...كم مره نحن قايليلج يوزي عن هالطبع...
حصه و هي رافعه راسها: بويه انا ما عليه منها...البنت بأخلاقها..و حشمتها...مهب بقواتها..
اليازيه: شوه قصدج يعني انا مقوي؟؟!!
حصه: هيه نعم مقوي...
غريسه: بس خلاص انتهى الموضوع...
محمد: يالله عيل شي فالخاطر من صوبنا انا بسير...
حصه: بويه؟؟!!! ما شبعنا منك توك ياي من السفر...
محمد: سمحيلي غناتي بسير...ورايه مليون علّه بخلصها علشان ألحق أرد و امتحن...
طلع محمد و اليازيه و حصه يتبعنه...عند الدري فالليوان..
اليازيه: بابا...؟؟!!!
محمد و بطنازه: بتخبركم عندكم ياهل اهنيه و انا مادري؟؟!!!
اليازيه:هيه بابا...شوه تباني ازقرك عيل؟؟؟ ابويه؟؟!! لا حشا ما بغي استوي شرات موزان العيناويه..(اليازيه و هيه تضخم صوتها)...بويه...بويه!!!
محمد: هههههههههه...الا الله يسلّم موزان من لسانج الطويل...ماحد مجمع حسنات كثرها من كثر ما ترمسين في قفاها...
اليازيه: انا بصراحه رمسة البدو مادانيها...
محمد: سمحيلينا طويلة العمر...بس بطيرين و بتحلين بتم اصولج بدويه...غناتي البدو تاج راسج جان ما تعرفين..
اليازيه: اوهوووووو...المهم نبا انسافر السنه...العام ما سافرنا ولا قلنا شي..السنه مستحيل ايلس اهنيه في فرن بوظبي...
محمد: و المطلوب يعني؟؟
حصه: بويه تبا اتقولك انه خالي عبدالله السنه مستحيل ايودينا لانه تعرف معرس يادوب يتهنا بشهر العسل..
محمد: أها...و تبيني انا اسفركن؟؟؟
اليازيه: اكيد...بابا الغالي..تاج راسي هو و البدو...منوه بيودينا غيرك..بتخلينا على تجلا خوالي؟؟!!
محمد: اولاً يا ام لسانين..
اليازيه: لو سمحت ظبي بوظبي...
محمد: ههههههه...و الله يهالبنت انه بزا و دلع الدنيا كله معبرتنه...عالعموم يا ظبي بوظبي غاليه و الطلب رخيص...و يكون في علمج خوالج امرره ما قصروا فيكن..بس انا السنه مستحيل اوديكن الا اذا بتتريين الين اخر ثمانيه..تعرفين عندي امتحانات و الماجستير مهب لعبه...
اليازيه: لا شوه الين اخر شهر ثمانيه...العالم كلها راده البلاد إلا نحن مسافرين؟؟!!!
محمد: و انتي اشلج بالعرب؟؟!!! تراج الجامعه و طبيتيها عشوه مستعيله يعني..و بعدين البلاد البرانيه ما تبرد الا بعد شهر ثمانيه...
اليازيه: لا البلاد اللي برا بارده حتى لو فالصيف الا جان بتودينا تونس شرات هاذيج المره...وعععععع انته ذوقك فالسفريات مب حلو...هالمره نبا انسير باريس....
حصه: بالعكس تونس واااااايد حلوه...بويه تذكر هاذاك اليوم بوم قيلنا في مزرعة الزيتون...
محمد: هيه...
اليازيه: لا...هاذيج المره حصه اللي اختارت تونس وانا هالمره اللي بختار مالي خص باريس يعني باريس..
محمد: مستحيل...ما بفضى...
اليازيه وبشهقه: هاذا و انا طالبتنك؟؟؟!!!!
محمد و هو يتنهد: اليازيه كد مره في حياتج رفضتلج طلب؟؟؟!!!
اليازيه: لا
محمد: خلاص لو مره قدري ظروفي....يا بنتي انا مسافر عن طريق الجيش و اكمل دراستيه هذي مب لعبه متى ما بغيت ارد رديت!!!
اليازيه و شوي و بتصيح: هيه امبوووونك انته تغيرت...من خذتها هاذيج حرمتك اليديده طبيتنا...نحن منو لنا فهالدنيا...تيتمنا و ابونا حي؟؟؟ شوه طلبنا منك؟؟؟!!! اتسفرنا؟؟؟ شفتها وايد علينا...و هيه كل صيف مودنها مكان..مره جنيف و مره هونج كونج لا ودها المريخ بعد...يحليلها بتخليه في خاطرها؟؟؟!!!!
محمد: ياهاذي ما سنت....اليازي..غناتي..فاطمه مالها ذنب كل ما استوا سوء تفاهم دخليتها فالسالفه..
حصه: بويه ما عليك منها...البزا بيظهر من ذنيها...الله يحفظك يالغالي..و الله يسهل عليك امتحاناتك..
محمد: خلاص عيل شي في خطركن من صوبنا...
حصه: سلامت راسك..يطولي بعمرك خيرك علينا وايد
سلّم محمد على اليازيه و حصه..و طلع يركب في سيارته...بعد ثواني نزّل محمد دريشة السيارة...
محمد و من بعيد: اليازي.......
إلتفت اليازيه صوب ابوها...
محمد: شوه راااااااااايج في لبنان؟؟؟؟
اليازيه و بضحكه: مش بطـــّــاااااااااله....
محمد: خلاص زهبن عماركن يوم الاربعا الساعه 12 الظهر بنسير...
اليازيه: و الله؟؟؟!!!! بهالسرعه؟؟؟
محمد: هيه بهالسرعه...بس بنسير الاردن قبل...اسبوع بقدم امتحاناتي و بعدين بنسير لبنان، شوه الراي؟؟
اليازيه: مذله!!!
محمد: شوه ما سمعت؟؟ اكنسل؟؟!!!
اليازيه: خلاص...خلاااااااااااااااااص...احجز احجز....
محمد: فمان الله...
اليازيه: في حفظ الله..
دخلن حصه و اليازيه داخلن و هن يضحكن...
غريسه: هاه سار ابوكن؟
حصه: هيه الله يحفظه...
غريسه: و انتي يا ام لسانين يالسه تطلبين جنج طلاّبه بشي قصرنا عليج؟؟!!
اليازيه: شوه هاي طلاّبه بعد؟؟!!! هذا بابا و اذا ما طلبت منه ايسفرني من منوه بطلب يعني؟؟؟ من خوانج اللي كل سنه ذالينا ذل على السفر؟؟!!!
غريسه: عيب عليج هالرمسه؟؟!!! و ثاني مره يان عديتها لسانج بقصه من العكر، فاهمه؟؟!!!
اليازيه: امبونها الصراحه وين ما تضرب اتعوّر، لو مب خالي عبدالله جان الله يرحم من مذلت خالاتي و خوالي مادري عشوه شايفين عمارهم، لبسوا المشيخه ولا يازتلهم...
غريسه: مب منج ظاهره عليه...
اليازيه: و شبلاه بابا، هاه؟؟؟ شبلاه؟؟؟ ريال من زينة الرياييل مب معناها انكم منفصلين اننا نكرهه و بس عليّه جاني شبهته فالشكل ولا فالطبع..
حصه: حشا على بويه من طبعج...فديته..عسل، و بعدين أماه خلاص الحين كل حد في حاله ما في داعي للتجريح..
غريسه: عالعموم عشوه اتفقتوا؟
اليازيه : لبنااااااااااااااااااااااااااااااان
غريسه: و بتسيرين وياها حرمته؟؟
حصه و اليازيه يتطالعن: مممممم...لا ....ما عتقد
اليازيه: نووو واااااااي....و الله ايلس و انحبس اهنيه ولا اسير وياها هاذيج مالت عليها...فطيمووه القشرا
حصه: عيب اليازيه...الحرمه ما ضرتج بشي..حليلها شيفتج ما شافتها في حياتها كلها، لا تتبلين عليها
اليازيه: اولاً ما تبليت، ثانياً سيرة وياها لو تنطبق السما على الارض ما دبرت شبر واحد وياها...
حصه: عيل ابويه ما بيسير بدون ام عياله...
اليازيه: لا و الله؟؟!!!! يبا ايودينا ايودينا نحن بروحنا و هو ملزومبنا، وانا من دون ماما مب سايرة...
غريسه: انا مستحيل اسير وياكم، يوم امبونه خالكن عبدالله ايودينا سرت اما الحين مستحيل...
اليازيه و بصدمه: ليش؟؟؟ نحن عمرنا ما تفرقنا؟؟؟ مستحيل انسير بلاج؟؟!!
غريسه: حبيباتي...برايكن سيرن هذا ابوكن و ما حد بيحفظكن و بيخاف عليكن كثره، وانا سامحتلكن اتسيرن من خاطريه...
حصه: مستحيل انسير بلاج، ولا اتسيرين ولا ما شي سيره بالاساس، أماه انتي بعدج على ذمة بويه
غريسه: حصه، هذا الموضوع ما فيه نقاش ابوج الحين منفصل عنا من اكثر من ثلاث تعش سنه، و ما ابا احطه في موقف محرج معايه...
حصه: ما عليه، بندبرها....ابويه ياخذله حجره عدال الشقه...
غريسه: عيب يا حصه..هذا ابوكن ما بنيلس انخششه في حجر..سيرن و الله حافظنكن..
اليازيه و دموعها على خدها: لين متا يعني نحن بنعيش على هالحاله؟؟!!! هاه؟؟؟ شوه هالحياه اللي عايشينها؟؟ حرام عليكم بس عذبتووونا.....بس....بس....
و ركضت اليازيه داخل...
غريسه: و بعدين وياها هالبنت متا بتكبر على هالبزا (الدلع)؟
حصه: و منوه ايقولج اننا نحن مب تعبانين من هالحاله؟؟ بس خافوا ربكم فينا؟؟؟ الابو في صوب و الام في صوب...ولا كد مره اتفقتوا على شي..
غريسه: ابوج ولا بردله...لو مره ما يتم ريال فالدنيا...
حصه: ما حد قالج رديله، اصلا ارتحنا من انفصلتو افتكينا من الحشره و المواقع بينكم ، بس لو مره اتفقوا على شي و فرحونا...
غريسه: شوه المطلوب الحين؟؟!!!
حصه: اتسيرين ويانا بعد شوه؟؟؟ ابويه ما بياكلج..تراكم اتشوفون بعض في كل مره ايينا ، خلاص انسير و كونوا رسميين...
غريسه: مادري بفكر و برد عليج...
حصه: فديت روحج أماه...عن خاطرنا ولو مره وحده...
غريسه: خلاص انزين...قلتلج بفكر ايصير خير..
تحت فالبيزمنت في مرسم اليازيه...اليازيه منسدحه على الكنبه و سلمي يالسه تتكلم فالتيلفون دشت عليهن حصه...
حصه و هي تيلس في كرسي عالطرف...: هاه علوم دبي؟؟؟ فججتن عن راسكن عاد؟؟!!!
اليازيه: اششششششششششششش...سلموه ترمس البوبو ( البوي فرند)...
اول ما خلصت سلمي المكالمه و سلمت على حصه...
حصه: شحالج سلموه؟؟
سلموه: بخير عموه شحالج انتي؟؟؟
حصه: اولا انا مب عموه انا حصه و بس، و بعدين مب بخير..
سلمى: ليش عسا ما شر؟؟؟
حصه: من سواد ويهج...منو هاذا اللي يالسه ترمسينه؟؟؟!!! هاه؟؟
اليازيه: حصيص انتي مالج خص...
حصه: جب انتي...انا ارمس سلمى..
سلمى: و الله شوه اقولج؟؟؟!!!
حصه: لا تقولين ولا شي سواد ويهج يرمس عنج...أخخخ عليج يا سلمى ما توقعتها منج..استويتي نفسهن هاذيلا اللي ما يَسْـوَن شي...سويتيلج بوبو انتي بعد..
سملى و بإحراج: شسوي...شسوي بس و الله العظيم اني احبه و الله و حتى هو ايحبني و الله العظيم بيخطبني هو قالي و حلفلي انه بيخطبني....
حصه: هههههههههههههههههههه، و الله و استويتي مقصه يا سلمى من متا البوي فريند ياخذ اللي يرمسها
سلمى: لا و الله هذا غير و الله العظيم غير....هو يعرف انه هو اول و اخر واحد ارمسه في حياتي و انا ما عندي بوبو من قبل...
حصه: و من وين مهضلتنه هالبوبو بعد؟؟؟
اليازيه: شافته فالبول مال الياهو...فكلمة، فابتسامه،فايميل، فرقم...و شافته اليوم و ارتاحت...
حصه و بشهقه: اشوووووووووووووووووو!!!!!! آخرتها اتواعدين؟؟!!!!
سلمى: عموه حصه فديتج لا تقولين حق يدتي...فديت روحج، و الله ما غلطت، شفته من بعيد سلمت عليه و طلعنا على طول..
حصه: لا و الله ما غلطتي؟؟؟!!! حرام بس شفتيه و شافج...و نظره و كلمتين و انتهى الموضوع؟؟!!!
سلمى: شسوي انزين شو اسوي، اتورطت....احبه...و,,,و,,,,وووهو بعد يحبني...صدقيني هو انسان ستريت مب مال لعب...و بيخطبني صدقيني؟؟؟
حصه وبإستهزاء: يا حرااااام....انسان ستريت و ايدش البول و ايضيف البنات!! حرام حرام لا تفرطينه...حصه و هيه تلتفت صوب اليازيه...و انتي الشيخه اليازيه مواعده بعد؟؟؟!!!
اليازيه: اتهبين....انا اليازيه بنت محمد..اواعد؟!!!! بعده ما انخلق اللي بواعده و بذل كرامتيه عشانه...
حصه: ليش هاذيه سلمى ربيعتج الروح بالروح سوتها مب بعيده عليج...
اليازيه: لا حبيبتي ما نزل مستوايه دون...انا آخذ رقم فالسوق؟؟...بعدج ما عرفتيني زين مب انا اليازيه اللي بتكلم واحد فالتيلفون بالدس..مب انا اليازيه اللي بكلم واحد خام ما خلا وحده فالسوق ما رقمها قبلي و الله يعلم اول ما ادبر عنه كم وحده بيرقمها عقبي...
حصه: يمكن..
اليازيه: لا حبيبتي مب يمكن إلا أكيد، انا انا اكلم واحد فالتيلفون وهو الله يعلم كمن وحده من هالخايسات رقمها موجود في تيلفونه..مستحيل، انا ارمس واحد ايشرشح عمره فالمولات ورا البنات، لا حبيبتي كرامتيه ما تسمحلي اصلا.. هاذيلا تكاسي المولات ما تحقّ عيني اتطيح عليهم...
حصه: زين و الله يوم بعدج صامده...
سلمى: و الله يا عموه حصه انه واحد شافنا فالمول و لحقنا الين فندق الشانغريلا...بيموت و عموه اليازيه تاخذ رقمه بس عيبتني ولا حتا طاحت عينها عليه...و الله لو شفتي لي لي شوه سوتبه مسحتبه الارض
اليازيه: هاه حصيص ارتحتي...؟؟؟
حصه: و انتن شوه اتسون فالشانغريلا؟؟؟
اليازيه: اقص شعريه....في صالون عمرو سرناله فرع الرقه ولقيناه زحمه سرنا الفندق ويانا هناك، قصلي شعريه و ردينا..اليازيه و هي تلعب بشعرها..
حصه و هي اتحط ايديها على عيونها: الله يخليج لا تقوليلي انه الريال اللي قص شعرج؟؟؟!!!
اليازيه: هيه عمرو بكبره...
حصه: انتي ما تخافين ربج....اتخلين ريال ايشوف شعرج و ايقصه!!!!! وين عايشين نحن..كفرتي كفرتي؟؟!!
اليازيه و هي اتشوف عمرها فالمنظره: روعه لاه؟؟ محترف قصلي اياه في ربع ساعه، و بعدين كله من هاي فطيموه سوتلج غسيل فالمخ...عقدتبج...حصه انتي ما كنتي جذيه...استوا كل شي عندج حرام حرام ما تطلعين السوق ما تروحين ما تيين...لين متى يعني لين متى؟؟؟ هاي فطيموه بخبر أماه عليها بخليها تحرمج من السيره عندها...انا اول مره اشوف بنت تحب عديلة امها....
حصه: ليش ان اشالله اكرهها؟؟!!! هاه؟؟ وحده علمتني الصح من الغلط..وحده خبرتني شوه الحلال شو الحرام..تبيني اسوي سواتج..عنبوج انتي اللي سويته ما يرضاه لا دين ولا تقاليد...
اليازيه: كيفي!!!! كييييييييييييييييييييييييييييييييييييييفي....اوكي. .
حصه: لا حبوبه مهب كيفج اذا تتحرين انه ابويه سامحلج اتسيرين دبي مع لي لي سمحلج لأنج بتسيرين برجمان و اتردين ما سمحلج تربعين فالصالونات و تكشفين شعرج جدام الرياييل...
اليازيه: شوه بدينا انهدد؟؟!!! وانا ما كشفت شعريه جدام الرياييل طول السيرة و انا متنقبه..بس عشانه هو بيقص شعريه اضطريت افج الشيله...
حصه: لا و الله...ماتنلامين تربية المدارس الخاصه..و الأم ساهيه لاهيه..لا حبوبه الحرام حرام سواء كان حلاق ولا ريال عادي...
اليازيه: اوووهوووووو...انزين انا ما كنت ادري...
حصه: خلاص اليوم تدرين و مره ثانيه اذا سويتيها لي تصرف ثاني معاج...
سلمى: خلاص بنات...روؤووها شوي...اليازيه طول الوقت و هي متنقبه ولا كد سارت مره المول و كشفت ويهها..و اذا عاليوم غلطه و ما حد نبهها عليها...
اليازيه: شوه الحين بنسير لبنان ولا لا ؟
حصه: عن نفسي اذا ما سارت أماه أنا ما بسير..
اليازيه: انا بعد...بس انتي تعرفين مستحيل أماه اتسير و بابا موجود..هاذيلا ما عاشوا مع بعض من 13 سنه يعني ألحين بيطيعون يجتمعون في شقه وحده؟؟!!!
حصه: مادري...مادري...شوه فيها يعني تراهم كل مره ايشوفون عمارهم رباعه حبكت على هالمره يعني!!!
اليازيه: لازم نضغط عليهم انا مستحيل ايلس اهنيه فالساونا...ماقدر و بعدين لازم اسوي شوبنج...
سلمى: بتسيروووون لبنان؟؟!!!
حصه: هيه بتسيرين ويانا؟؟؟
سلمى: هالمره مستحيل...بسير مع قوم عايشه ال... ألمانيا...
حصه: الله يرحم ايام اول...وين ما نسافر انشلج ويانا هالمره اشوفج نطبتينا...الله يغربلج السيرة مهب حلوه بلاج...
سلمى: لا و الله...بس شوه اسوي..ياختي هيه طلبتني و انا استحيت اردها...
اليازيه: وانتي ما لقيتي الا عوشووه ما تدرين اني متضاربه وياها، مالت على هاذيج الشيفه ما تقولين الا سيلانيه...
حصه: احيدكن كلوز شياكن اتضاربتن...
اليازيه: هالبنت خامه...لا حد يطريها جدامي...
سلمى: عالعموم حتى هم بيسيرون لبنان قبل و خلاف بيسيرون ألمانيا عشان فحوصات أمها..ان شالله في لبنان بنشوف بعض..
اليازيه: أول خلي الراس العود يوافق، و بعدين يستوي خير...
سلمى: منوه؟
اليازيه: أماه..مب طايعه اتسير..
سلمى: لا لا عموه غريسه قولولها انكم ما بتسيرون بلاها و بتتلوم و بتسير..
حصه: المشكله مب أماه المشكله ابويه، مادري شوه بتكون ردة فعله اذا درى ان اماه بتسير ويانا..
سلمى: لا لا عمي محمد أطيب قلب في هالدنيا و ما ظني يعقد هالسالفه لهدرجه، تراها الا سفره كمن يوم و بتردون ..
اليازيه: الله يسمع منج..
+ + شوه هالحياه اللي متشربكه تشربيك..الابو في صوب و الام في صوب..و الله العظيم اني احبهم بثنينتهم و اباهم ايردون لبعض..وفي نفس الوقت مابا هاذيج الليالي السودا اترد مره ثانيه..يالله كله ولا هاذاك الكابوس ما بقدر اعيشه مره ثانيه..حياتي كانت اسود في اسود..الكل يعرف انه بابا ماخذ اماه عن قصه حب رغم انه من قبيله و هيه من قبيله ثانيه، بس مثل ما قالتلي هيه مره من المرات انهم كانوا جيران، وان بابا رفض بنت عمه بس عشان ياخذ اماه، وين الحب الاسطوري اللي تبخر من خذوا بعض..صدق ان الحب جذبه نعيش انفسنا فيها و اول ما نكتشف هالشي نلقى كل شي حوالينا متهشم..و خاصه اذا كان عيال فالموضوع..هم اللي يجنون الثمن..حصه اختيه يمكن عانت اكثر مني..بحكم انها اكبر عني بثلاث سنين..و كانت ادرى باللي يصير حواليها..لكن ما انسى الايام الاخيره اللي كان بابا فالبيت كاانت كابوس مظلم..مظلم..مظلم..يخليني ما اتمنى ردتهم لبعض اذا اللي صار ممكن ايصير مره ثانيه...

~~~~~~~~~~~~~~~~~~~~~~~~~~~
و في هذه الاثناء الأجواء فالعين المدينة الجميلة...

شما: أوووهووو أنتن بعدكن ما خلصتن حرااام عليكن مبارك من الصبح ملطوع فالمدرسه و انتن يالسات اهنيه...
مدية: أنا خلصت...خلاص بس مادري عن جميله...
شما: مدووي حرام عليج...متى بتخلص جميله..جميله يبالها ساعه ألين ما تخلص...
مدّية: لا لا ما عليج منها مويصيتنها عن لا تبطي...
شما و تيلفونها ايرن: هاذوه سوالي نياز حاشر الدنيا...ألو..
نياز: ها شما وين هاذا بنات ايريدن ايسيرن الجامعه..حرام هاذا ولد من الصبح يتريا داخل مدرسه تأخرنا واايد
شما: خلاص خلاص يالله اخطف انته على بيت عمتيه عوشه و شل جميله و تعال اهنيه بيتنا و شل مدّيه و خطفهن الجامعه...وخلاف ييب مبارك
نياز: لا لا لا ...انا اول بجيب مبارك و بعدين بودي هاذيلا بنات الجامعه...
شما: انزين انزين يالله بسرعه سر هات جميله...يالله مع السلامه...ما ترزا علينا حفلة الجامعه لاطعات الصبي من القايله فالمدرسه..
مديه: شميم حرام عليج...شوه انسوي يوم الثلاثي الكوكباني سايرات معاريس مع صفوان منوه تبينا ايودينا الجامعه ياختي ربيعاتي كلهن متخرجات و ابا احضر حفلتهن
شما: يعلهن ما يحتفلن دبت حياتهن، يعني هن بيحضرن حفلتكن يوم بتتخرجن؟؟!!!
مديه: ألين ما نتخرج نحن تموت ناس و تحيا ناس...
شما: مديه شكلها جمول ما خلصت شرايكن اخلي عبدالعزيز ايوديكن؟؟!!!
مديه: لا لا لا لا لا حرام عليج...خافي ربج مالقيتي إلا عبدالعزيز أخويه و الله ما يخليني ادبر، تعرفين الروج ما يدانيه كيف يوم بيشوفنيه متعدله و سايره الجامعه و الله يحرّم عليه الجامعه و سنينها..
شما: و الله عزوز سواله راس..بتخبرج وينهم اليوم مالهم شوف؟؟!!
مديه: تراه مانع و خالد الله هداهم و عندهم المدرس، و عبدالعزيز و محمد ايشوفون المباراه في بيتنا، ما تشوفيني يايه عندج اتمكيج حتى مكياجي ما رمت اشله...
شما: حشا يا بوج جلب بوليسي مهب اخو...
مدّيه: شوه اسويبه...
شما: بإختصار لا تعطينهم ويه...يالله خلينا انحوّل عشان تلحقن اتخطفن على امبيريج...
نزلن شما و بنت عمتها مدّيه تحت...لقن عمهن عبيد يالس تحت و يقرا في كتاب بين ايديه...
شما: مرحباااااا السااااااااااااااااع...مرحبا الساااع...
العم عبيد: امرررحب لاهان...وينج انتي سودا الويه من القايله انا يالس اهنيه رويحتيه...
شما: يالله يعلني هب بلااااك..عميه شوه قالولك امريكا اعرف باللي يستوي كله..مادريتبك انك اهنيه...
مدّيه: شمسيت خالي؟
عبيد: منوه الحرمه؟؟
مدّيه: وابويه يا خالي واحالك نسيت مدوووووي حسناء داحس و الغبراء، ملكة جمال الربع الخالي.. يعني منوه؟؟
عبيد: وشعنه متغشيه...
مدّيه و بصوت واطي: بيفضحنا عاد الحين الشيبه...خاليه تراني عالغدا مسلمه عليك...
عبيد: جانج حرمه فجيها الغشوه..
مديه : لا حول ولا قوه
عبيد: وه........سواد ويه ثره....شوه هالصبغ اللي متصبغتبه؟؟!!!
مديه: بالمختصر المفيد...خالي عندنا حفله فالجامعه و بسير الحين شي في خاطرك؟
عبيد: هيه زين بنتيه ما شي ايي من وراكن غير العثره...ما تبين عصا تشلينها وياج جان بترقصين..فجي شعرج جدام الريااييل زين تراه بينجحونج...
شما: ههههههه...نقمه...
مديه: لا خالي لا تألف شائعات الجلاب البوليسيه بيسمعونك...ما شي رياييل فالجامعه وين عايشين نحن فأمريكا!!!!
عبيد: تراكن اتقولن الدكتور الفلاني و الدكتور العلاني...
مديه: هاي ضريبه يوم ايكون عندكم شيبه فالعايله مثقف!!! خالي الدكتور ايدرس الصبح اما فالحفله ما يحضرون ما يشوووفوووونا...اللي يسمع حسناوات شبه الجزيره بيختطفونا...
عبيد: وه...خذها باني العرش من جامعه!!!! هب اتحيسينه لسانج جدامي ولا تراه ولله ياحلف ما دبرين شبر صوبها...
مديه: خالي....العزيز....نراك فالحلقه القادمه...فمان الله...و طلعت مديه..
شما: شياك عليها عمي؟؟!!
عبيد: وه...ثرني شوه سويت..يالس اغايضها الاّ..اعرفكن يا بناتيه حشام ولا تبن رمسه..إلا مديه من تنغزها تلابقت جنها حريجه...
شما: و انته بتمووووت وبتشووفها معصبه؟؟!!!
عبيد: هاي مدوووي خويطرها طيب...و اللي عقلبها علسانها..تعيبنيه يوم اتلابق...
شما: هاه؟ هاه؟....ترا قمنا انغار...
عبيد: اللي ما يغار بوه حمار..
شما: عمي؟؟؟ و رفجه اتقولي منوووه اغلا من البنات عندك؟؟
عبيد: وه...خذج باني العرش من مكّاره ...
شما: عمممممممممممممي!!!!! لا تدعي عليه هالدعوه...بعدني ما عرست ولا شفت بذريه!!!!
عبيد: ييييي هااااا....يا سودا الويه اتصيحين العرس جدامي!!!!
شما و بحزن: ييييييي يا عمي...جنك الا ما تعرف...منوه يباني انا عانس!!!
عبيد وبعصبيه: بعمرج يان عديتها هالرمسه...انتي شما بنت راشد...الريااااييل بس عليها يوم بيخطبونج
شما: وينهم الخطاطيب ثرهم؟؟!!! الله شل خيرهم
عبيد: بنتيه انتي ما بلاج شي...و جانج بتشوفين على هاذاك الهرم الخايس اللي خلاج..مهب منج منه اللي ما عرفت اربيه..و ربيعه سبال...و افتكيتي منهم ثنينتهم..واحد هايت في هالدنيا ما عرفناله قبله..و الثاني هاذكوه من يخطب ماحد قربه...(عبيد و هو ايلف صوب شما)..العربان اتحرا ابوج ما يقرب عليج حد ايشووفووونج بنيه وحيده عندهم..و الله اني سمعت بذنيه ريال ايقول انهم يبون ايخطبون عند ابوج الا متهوبين لا يردهم..
شما: ما سمعت انته اخبار عن مطر؟
عبيد: ايهبي هباه الله...ولا ابا اعرف عنه شي...
شما: عميه مهما كان هذا ولدك...و راس مالك في هالدنيا...وين تباه ايطس؟؟!!!
عبيد: ووووووه يا بنتيه...لا تطرينه جدامي...و عقب تنهيده طوويله...رمستنيه البارحه بنتيه مريم اتقولي انه رمسها من كمن يوم...شمستوي عليه..اللي له عمر بيعيش...وانتي رمستنه حاضر..؟؟!!!
شما: هيه مرمسينه البارحه...بعدهم عمي مطولين هاي دورة يباله وقت الين ما تخلص...
عبيد: عاد هو الله يهديه ساير و خلي بنياته و حرمته اروووحهن..
شما: عيل وين تباه يفزعبهن الأردن؟؟!!! ماخذين فله و كل الشباب اللي مسافرين وياه فيها وين بيحطها؟؟
عبيد: و الأردن ما فيها ألا فله وحده؟؟!!! بتخبرج هيه شله ما تيي العين زابنه في بوظبي؟؟!!
شما: منو؟
عبيد: وديمه حرمت حاضر...
شما: ما تيوزلها العين...استوت من هل بوظبي...
عبيد: وايه يعل العين بلاهن....ياغير تولهنا على عويناتي...
شما: عويناتي ما عليك منها حاشره الدنيا تبا تي اهنيه...من تخلص امتحاناتها وصيت ابويه و امايه ايبونها وياهم ما بنريا الليدي وديمه اتشرف العين بحضورها...
عبيد: عنبوه شمتحاناته ؟؟؟ مهب صف الاول هيه..
شما: هيه عمي...صف الاول يعطونهم امتحانات بعد...بتي ان شالله...من تخلص
عبيد: تغربلن...تولهنا عليهن...




ترقبو قصه دانني والجرم حبه في البارت الياي

يسلمؤؤؤؤؤؤؤؤؤؤؤؤؤؤؤؤؤؤؤؤؤ اختي عالقصة الجميلة

وننتظر التكمله

اخوكم


قناص البدو

تسلم على المروور خويه

وان شاء الله بنزل التكمله خلال هالأسبوع إذا ما سافرت

ولا تحرموني من الردود الحلوه

يسلموو على هالقصة الروووعة

عاد نتريا الجزء الثاني

والسموووحة على القصووور

تسلم خيووو على المروور

حبيت انزل الجزاء الثاني لني يمكن أسافر قرييب



الجــ.ــزء الثــ.ــانــ.ــي

بعد الاستعدادات السريعه للسفر اللي سونهن البنات عشان ايسافرن مع ابوهن يا يوم السفر، مادري كيف بتكون هالسفره، اننا انسافر مع بابا هالشي مب يديد، بس ان اماه اتسافر معانا مادري كيف بتكون الأوضاع، طبعا هيه ما كانت بتسير الا بعد الضغط الهائل اللي مارسناه انا و حصه اختيه عليها...و ألين آخر لحظه كانت رافضه و ما كان قرارها إلا يوم قلنالها نحن خلاص ما بنسير الا اذا انتي بتسيرين......غصبا عنها وافقت!!
اليازيه: هاه بابا كل شي جاهز؟؟
محمد: هيه يالله يالله بنسير الطياره وين امج و اختج؟؟!!
اليازيه: سارن التواليت و الحين بين...
محمد و بعصبيه مكتومه: شوه؟؟!!! كيف ايسيرن برووووحهن هاه؟؟!!
اليازيه: يالله يالله يالغيره...التوااااااااليت...تباهن ايشلنك وياهن؟؟!!! بابا....من الحين بتشتغل الغيره؟؟
محمد وهو ييلس عدال بنته...ألتفت صوبها بهاذيج الملامح الجذابه... محمد ما كان وسيم بمعنى الكلمه بس كان جذاب بصوره مب طبيعيه...رغم انه عمره سبع و ثلاثين سنه..إلا انه كم الشعره البيضا اللي في لحيته تزيده هيبه..و خشمه الحاد ايخليك تتهوب من شخصيته..و ملامح الشبه بين اليازيه و ابوها غير طبيعيه توصل لحد التطابق..بس ابتسامه اليازيه الخجوله تعطيها انوثه طاغيه...
محمد: اليازيه,,, اصطلبي...و عن هالتخرفيت الوضع ما يتحمل...
اليازيه: بسم الله...ما يتحمل مره وحده؟؟!!! بابا اذا ما تبا اماه تسير ويانا قول..ريح عمرك..مافي داعي اتكلف على عمرك و تتحملنا بعدنا فالبلاد...!!!!
محمد و بتنهيده: لا حوووووول....هذا مهب قصدي و انتي تدرين....ليتج لو تدرين بس...
اليازيه: بابا...و الله ما قصدنا شي من هالسيره...و اماه ما كانت موافقه ابد عالسيره..الا انا و حصه ضغطنا..كم مره طلبت منا انا انسير بدونها بس نحن ما وافقنا..و جانك اتشوف انه هالشي مضايقنك..قولنا و بس..
محمد: هالشي مب مضايقني ابد...بالعكس انا مستانس وايد..بس مادري..اخاف امج تتضايق من السيره ولا شي..وانا في حياتي كلها لا بغيت ولا ابغي اني ازعلها في شي..
اليازيه: عيل يوم هيه اتهمك هالكثر...ليش كل واحد عايش في صوب؟!!! ليش نحن ضايعين بينكم..
محمد و هو يرفع راسه صوب حصه و غريسه و هن يايات صوبهم: جذيه احسن..لي و لها و لكم..
++ اف من هالحاله...اذا هو ايشوف انه الفراق احسلنا كلنا ليش ما يطلقها؟؟!! ليش ما يفترقون رسمي؟؟!! نفسي بس اعرف اجابه لهسؤال..رحنا صوب الطيارة بابا على يميني و اماه على يسار حصه و نحن فالنص، ركبنا الطياره و اتفجائنا انه في كرسين عدال الدريشه و الكرسين الباقيين فالنص لا إرادياً سرت انا سيده و يلست عدال الكرسي اللي عدال الدريشه و حصه اختيه سوت نفس الشي يلست عدالي، يوم إلفتنا شفنا امايه واقفه فوق راس حصه..
غريسه: الحص غناتي...سيري يلسي عدال ابوج...
رفعت حصه عيونها الناعسات بكل براءه: لا...أماه ابا ايلس اهنيه عدال الدريشه...!!!
جدمت راسي جدام و شفت بابا و هو واقف في نص الطياره و الحيره تملا عيونه..اليازيه: بابا..نبا نيلس عدال الدريشه نحن قايليلك من قبل.؟؟؟!!!
محمد و هو مرتبك: انزين عشان امكن...وحده منكن اتيي اهنيه...!!!!
اليازيه: سوري انا ما بتحرك...و غمزت حق حصه اللي فهمت شو المغزا من هالحركه اننا انخليهم ييلسون عدال بعض خلال الساعتين و نص اليايات...
حصه و بكل براءه: انزين اماه...بيلس عدال اليازيه الين ما تطير الطياره..يلسي عدال ابويه شوي بس..
اليازيه: اماه يلسي عدال بابا ما بياكلج هو...
غريسه و شوي بتضربهن: اوكي اوكي...الين ما تطير الطياره بس!!!! تسمعيني حصيص ولا لا !!!
حصه: ان شالله ان شالله...
++ يلسنا انا و حصه عدال بعض ويلست اماه عدال بابا، الين ما طارت الطياره..و عقب ربع ساعه ألتفت حصه صوبهم لقتهم مندمجين يالسين ايطالعون وحده من المجلات..
حصه: أقولج زوزو...شوه الراي الحين اقولها اتبدل الكراسي...
اليازيه: لا لا ما عليج منها دامنها هيه ما قالت تبا اتبدل خليهم...طالعي انتي مسرع ما تقولنا ما تبا تيلس عداله و ألحين مب رايمين نفصلهم عن بعض...
حصه: ما عليج منهم...امبونهم جذيه و في دقيقه يجلبون على بعض..ما شفت ثنينه في حياتي متناقضين شراتهم..
اليازيه و بتنهيده : ما عليج منهم و الله انهم يحبون بعض..
حصه: أماه هيه اتحبه...بس ابويه؟؟!!! لا ما ظن...
اليازيه: يعني في ذمتج يكرهها..
حصه: لا...مادري مادري..ابويه خلاص خذ وحده ثانيه و مستقر معاها و اكيد انه ايحبها!!!
اليازيه: اوووووف منج لا تطرينها جدامي الله يخليج..باباه ايحب اماه سواء عيبج هالكلام ولا لا..بس هو ما يحب اسلوب حياتها..مهب هالشي اللي خلاهم ينفصلون؟؟!!
حصه: مادري مادري..
++ مر الوقت بسرعه و ما حسينا الا و الطياره نازلتبنا في مطار عاليه الدولي، اتريينا شوه الين ما يا الدريول و طلعنا معاه..و تمينا انلف على كذا فله عشان نسكنها..وفي كل مره الفله ما كانت تعيب بابا..ألين ما دخل علينا المغرب و نحن انلف و انلف...و دخلنا وحده من الفلل صغيرونه فيها حجرتين فالدور الاولاني و حجره و غرفه طعام فالدور الارضي و فيها حوش صغير فيه كراسي ايطل على الشارع و كله مزروع عنب و تفاح...دخلنا و يلست على الكراسي اللي فالحوش الضيق...فالوقت اللي سارن فيه اماه و حصه يشوفنها من داخل..
اليازيه: بس خلاص بابا...هلكنا...اللي يسمع بنسكن اهنيه الدهر كله...خلاص خلاص هالفله حلوه..
محمد: لا هالفله ضيقه وما بتاخذن راحتكن فيها...و يلس بابا عالكرسي قمت انا و لفيت من وراه و شليت غترته و عقاله و حطيتهن عالطاوله، و لفيت ايديني على جتوفه و بسته على اذنه...
محمد: اشتغل عاد البزا...
اليازيه: لازم انا ظبي بوظبي,,,ولازم اتدلع...باباه بصراحه هالفله حلوه..و أيجارها مب غالي و حلوه عدالها سوبرماركت كبير..و بعدين...اممممم...
محمد و هو ايبوس ايدين اليازيه وحده ورا الثانيه: و بعدين.؟؟
اليازيه: في حجرتين فوق بناخذهن نحن واماه و الحجره اللي تحت خذها انته بهالطريقه انته بتاخذ راحتك..يعني ما بتحتك وايد بنا...
محمد: و ليش انتن ما تبني احتك وايد بكن؟؟!!
اليازيه: اووهووو...انته اتعرف شوه اقصد..
محمد: انزين شاوري امج جان عيبتها يالله بنرمس الريال...
اليازيه: ما عليك منهن...الشور عندي انا..بصبع واحد اهبّـهن و اسندهن على قولتك
في هاللحظه ظهرت حصه من بلكونه فوقنا مباشره...و طلعت وراها ماماه..
محمد: هاه الحص...عيبتكن الفله...
حصه: هيه وايد حلوه...اليازيه المطبخ وايد حلو و فيه بلكووونه ...تعالي فوق..بسرعه..
محمد و هو يحاول ايخلي غريسه تتكلم: اكيد؟؟!!...يعني اكلم الريال...و اتفق وياه؟؟!!
غريسه و بإبتسامه جميله: هيه توكل على الله...
اليازيه: يوم قلتلك ...ارتحت عاد الحين عقب ما ضحكتلك...
قام محمد و قرص اليازيه في غزها: و انتي برج مراقبه حضرتج؟؟!!!
اليازيه: باباه؟
محمد: ا- ب- و- ي- ه
اليازيه: باااااااااابااااااه؟
محمد: ابووووووووووووووووويه
اليازيه: بابا عااااااد عن الغلااااااااسه....والله تراه مرات دمك اثقل من التانكر
محمد: ما برد عليج...قولي ابوووويه...بتموتين يعني؟؟!!!
اليازيه و بدلع : ايه انته...بصراحه بصراحه منوه اغلا حد عندك في هالدنيا؟؟!!
محمد وهو يتصنع العصبيه: ايه شوه هالاسلوب يون ( وايقلد اسلوب اليازيه الدلوع فالكلام) ايه انته؟؟!! اصغر عيالج؟؟!!!
اليازيه: جااااااااااااان اخاف؟؟؟ بصيح بصيح... ما تعرف اتمثل...احم احم....ابويه
محمد و بصوووت عالي: لبببببببببببببببببببببببببببببببببببببببببببببببــ ــــيه
اليازيه: هههههههههههههه لو ادري انك بترد عليه بهالرد جان من زمان زقرتك(ناديتك) ابويه...
محمد: يالله الزوز خلصي شوه تبين بسير اتسبح تعبااااااااااااااااااااااان علاخير...
يلست اليازيه عدال ابوها على الكرسي اللي يادوب شلهم و يالله يالله متحملنهم...اليازيه: منوه اغلا حد عندك؟
محمد: يعريه و تدلعين....بعدين ايه الكرسي يالله يالله ايشلنا...تبين تطريحنا...
اليازيه وهي تضم ابوها بقو: يالله قووووووول لا تغير الموضوع
محمد: انتي بعد منوه....و انتي اتعرفين بهالشي...و تغير صوت محمد في هاللحظه...انتي عيونيه المركبه...
اليازيه: صدق؟؟
محمد: انتي الروح اللي في يوفي...اليازيه لو بييب الف بنت عقبج ما حد بياخذ غلاتج..
اليازيه: بويه...جان ما قلتلك من قبل تراااني واااااااااااااايد احبك...
محمد: لا وايد قلتيلي بس عاد من البزا يالله قومي ارقدي..باس محمد اليازيه على راسها..تصبحين على خير..
اليازيه: و انته من اهله
++ قمنا كلنا و دشينا داخل الكل خذ شَوَر و رقد رغم ان الوقت كان بدري، عالساعه 12 و نص فليل قمت و انا يووووعانه خاصه انه ما كلت لا فطياره ولا فالبيت قبل لا نسافر، ما عرفت شوه اسوي..بس مستحيل اييني الرقاد و انا يوعانه..طلعت بشوف اذا في اكل..دشيت المطبخ..فجيت الثلاجه و حصلتها فاضيه، يالله اصلن اليوم نحن ما اشترينا شي اكيد بتكون فاضيه؟؟!! يالله و الحل يعني...بموووت من اليوع...في نفس اللحظه سمعت صوت تحت..منو؟؟؟ نزلت شوي شوي شفت بابا و هو شال بوكس في ايديه و ساير صوب حجرته..
اليازيه و بصوت شوي شوي: باباااااه...
محمد ألتفت بسرعه و بخوف: انا رااااعي سمحه...بتخبرج انتي شوه موعنج ألحين؟؟!!!!
اليازيه: شوه شال!؟؟؟
دش ابويه داخل غرفته و قام ايطلع الاغراض من البوكس
محمد: أغراضي يايبنهن من الشقه الأوليه...لا تنسين عندي امتحانات هالفتره...
اليازيه: خربنا عليك صح؟؟!!
محمد: لا لا...ماشي هالاسبوع و الاسبوع الياي و بس..و بنسير لبنان خلاف...
اليازيه: بابا...متأكد انا مب مضايقينك؟؟!!!
محمد: اليازيه كم مره بنعيد الموضوع عاد؟؟!!! خلاص انا ما سوي شي مهب مقتنع فيه...ما قلتيلي ليش مارقدتي؟
اليازيه: بصراحه....بموووووووت من اليوع...
محمد: صدق انج بنت بووووج...انا بعد يووعان...سيري هاتي عباتج..
اليازيه: وين بنسير؟؟
محمد: بندورلنا أكل...كديش الساعه هلأ...
اليازيه و هيه تضحك على اسلوب ابوها: تويلف ثيرتي..ما كلتلي وين بنحصل مطعم فاتح هلأ؟؟
محمد: سيري هاتي عباتج...اعرف مطيعم صغير..ما يسكر..ايسوي شاورما..احلا شاورما بتذوقينها في حياتج
++ طلعت فوق بسرعه و يبت عباتي و شيلتيه..و طلعت لقيت بابا برا يترياني..اول ما طلعنا من الفله لقيت سياره صغيره سودا موديل شوي جديم..
اليازيه: ان شالله بنركب في هالسياره؟؟؟
محمد و و يشغل السياره: هيه...الليدي اليازيه...تبينا نيبلج ليموزين يعني؟؟!!
اليازيه: و الله ما ركبت فيها...برستيجي ما يسمحلي..من عقب السيارات اللي كنت اركبهن تباني اركب هاي الخنفسانه؟؟!!
محمد: الزوز يالله اركبي و لا ترا و الله ادبر عنج ولا اييبلج شي..
ولأني أعرف بابا زين و اعرف انه بينفذ تهديده ركبت من جدام وياه..و حطيت حزام الامان..لانه بصراحه في سياره تقولون قبر..و بسواقه سكّان عمّان...حسيت جني راكبه قطار الموت مب راكبه سياره..و عقب هالمشوار وصلنا المطعم و طلبنا سندويجات اللي بالفعل مثل ما قال بابا اروع شاورما كلته في حياتي..
اليازيه: بابا شغل المسجل..
محمد و هو يتصنع: افففففففففففففففففف...لا تكلميني ريحتج شاورما و ثوم
اليازيه: هيه انته اللي يطولي بعمرك ريحتك دهن عووود...
محمد: ههههههه...حشا حاط طن ثوم فيه...يالله سيري ارقدي الحين باجر الصبح بنسير السوبرماركت بناخذ اغراض انزين؟
اليازيه: اوكي اذا ما قمت تعال انته ووعني...
محمد: و الله بنات اخر زمن...يالله بويه ارقدي و تلحفي زين تراه فليل بيزيد البرد
اليازيه و انا ابووووووووس بابا متعمده عشان ريحت الثوم: ان شاااااااااالله...
++ طلعت فوق وانا ميته من الفرح...من زمان ما حسيت انه بابا قريب مني لهدرجه..يالله اتذكرت هاذيج الايام اللي ما كنت فيها ما ارقد الين ما يرقد بابا عدالي..يا ترى شي امل ولا لا في انهم ايردون لبعض..اتمنى ابويه ايرد مره ثانيه لنا,,لبيته...لبناته ولا هو خلاص استقر بحياه ثانيه و استوينا نحن ما نعنيله اي شي بس بنات في خلاصه القيد !!!!! و كل هالاهتمام اللي يبينه صوبنا ماهو الا شعوره بالواجب؟؟!! لا مستحيل انا اعرف غلاتي عند ابويه و انه لو ياب عقبي الف ولد ما بياخذ حد غلاتي...رقدت من التعب..و قمت بسرعه خاصه انه المكان يديد عليه..بعدين شكلها الحجره اللي انا فيها ما فيها ستاير فالشمس ضايقتني وايد..قمت و سرت صوب الدريشه وانا امط ايديني من الكسل..فجيت الدريشه وليتني ما فجيتها لفحني البرد فسكرتها بسرعه,,سرت و خذتلي شور عالسريع و لفيت شعريه لبست بنطلون جينز واااسع و بدي,,,يالله محلات الجو,,ابا اعرف بس كيف اهلها اللي عايشين فيها مخلينها و يايين عندنا في لاهوب الخليج؟؟!! نزلت تحت و انا اعرف انه ما شي اكل طلعب برع..و يلست فالحوش الضيق على واحد من الكراسي,,,الساعه كانت توها ثمان و نص,,مستحيل انه بابا ما قام الين الحين احيده من النوع اللي يقوم من بدري..اتريت و اترييت الين ما وصلت الساعه تسع و هو بعده ماقام,,,يالله و انابموت من اليوع,,,قمت و سحبت لي الكرسي اللي انا يالسه عليه ألين شيره التفاح..و تميت اناقز ابغي تفاحه مارمت اوصلهن..في هاللحظه خطف واحد من الزلمات عدال الحوش خاصه و يلس ايراقب انا شوه اسوي خاصه انه السور مب يدار الا شبك..
الريال: شوه عم بيعملو الحلوين...
اليازيه و بخوف: احوّلت عيونك يا ربي...
الريال: شوه بدك تفاحه...لكان افتحيلي الباب تحتا اجيبلك تفاحه...
اليازيه: و الله ان ما ذلفت الحين يا ضربك بهالجوتي على راسك...
الريال: اي تعي اضربيني...
نزلت بسرعه و فجيت الجوتي و صوبت عليه و ضربته...صح الجوتي ما ضربه بالكامل اهم اشي انه ضربه على جتفه...يالله بشوه حسيت هاللحظه..استانست من الخاطر...
الريال: شوه هاظ؟؟ انتي صبيه ولا وحش...
اليازيه: اشوف ما عوّرك الجوتي زين...تبا اتجرب الثاني؟؟
الريال: لا دخيلك...و مشا الريال..
رحت ويبت الجوتي وشليته لسبته و انا مصممه اوعي بابا و انسير ناخذ لنا اكل..رحت الين حجرة بابا و دشيت عليه و هو الحبيب بعد رااااقد...يالله شوه هاذا..سرت و يلست عداله على الشبريه..
اليازيه و بصوت واطي: بابا......باااااباااااااه.....باباه يالله قوم بنسير السوبرماركت انته وعدتنيه...
ماشي رد فعل...اليازيه و بصوت شوي عالي: بااااابااااااااااااااااااااااااه....يالله عاد انا يووووعانه...
ماشي رد...قمت عدال ويهه و استخدمت الطريقه اللي كنت استخدمها يوم انا ياهل عشان اوعي بابا..قمت ونفخت على عيونه...تميت تميت...ألين ما فج عيونه..
محمد: اليازيه..
اليازيه: هيه
محمد: الزوز حبيبي...جلبي ويهج..
اليازيه: انا اليازيه اتقولي جلبهي..ويهج؟؟!!! اوكي اوكي..و قمت بسرعه بطلع من الحجره..ما حسيت الا بابا راكض ورايه و ماسكني من ايدي..و انا اتصنع اني اصيح..
محمد: بس بس...عنبوه انتي ما حد ايروم يمزح وياج؟؟!!! ايه الزوز..بس عاد...انا اموت ولا اشوفج اتصيحين
اليازيه: والله؟
محمد: يالهرمه؟؟!!! يونج اتصيحين؟؟!!
اليازيه: اتغلى عليك...يالله بنسير السوبرماركت
محمد: يالله..باخذ شور و بنزل تحت..
نزلت تحت و يلست اتريا بابا اللي نزل عقب ربع ساعه لابس كندوره بيضا و مب لابس غتره و لابس نظارات شمسيه..
محمد: يالله انتي ما تلبستي؟؟
اليازيه: لا مخلصه بس بلبس العباه..و انا يالسه ألبس العباه..
محمد: هاه هاه هاه؟؟ شوه هذا؟؟ بتسير السوق و انتي لابسه هاللبس؟؟
اليازيه: هيه شوه فيه....مب مفصخ؟؟!!!
محمد: لا الشيخه اليازيه مهب مفصخ..بس تبين اتسيرين السوق ببنطلون؟؟!!!
اليازيه: هيه شوه فيها؟؟!!
محمد: شوه فيها؟؟!!!! لا حبيبي...يالله سيري غيريه..لبسي تنوره..ولا كندوره..
اليازيه: مستحيل...تباني امشي كيلوين و انا لابسه تايير؟؟؟
محمد: و مستحيل اتسيرين جذيه السوق..ممممممممممممممممممممنوع....البنطلون فالبيت و بس..اصلا انتي كبرتي على هاللبس و انتي اتعرفين انه هاللبس مهب من عاداتنا و منقود البنت اللي تلبس جذيه!!!!
اليازيه: يي علينا....بدينا عاااااد....برايك روح السوبرماركت أرووحك...أنا بسير فوق برقد...
محمد و بعصبيه مكتومه: اليازيه!!!!!!....قلتلج سيري بدلي لبسج و بنسير السوق مع بعض...
اليازيه: ما بسير...انا يوم كنت بسير ما بسير جذيه...بسير و انا لابسه عباه اسلاميه مسكره عليه,,,يعني منوه بيشوفني بالله عليك؟؟!!! ولا لازم كل شي نتعقد علشانه و انسويها سالفه عوده!!!!

محمد: اوووووووف...اليازيه باباه..انتي ما شالله...انتي..يعني...تعرفين...يعني انتي...ما شالله مهب صغيره..تعرفين يعني..جسمج ما شالله..لو بكندوره يلفت..وين بتلبسين بنطلون وبدي عليه!!!
اليازيه: انزين انا ما بسير جذيه؟؟!!! شوه بلاك انته!!! بلبس عليه عبااااااااااااااااااااااااااااااااااه..اختراع اسود يلبسووونه عشان يستر شوه لابسين تحته؟؟!!!
محمد: انتي الرمسه وياج ما تجني ثمرها...يالله قومي...لبسي عباه مسكره من كل يمب..لا تخلين شي ايبين..
اليازيه: انزين يالله..بسرعه بلتبس و بلحقك...
++ طلعنا من البيت و بما انه السوبرماركت مهب بعيد وايد عن الفله..مشينا و أنا طول الوقت لازقه في بابا..مشينا اول شي و صعدنا جسر..و ووقفنا جدام اشارات مرور عشان نعبر الشارع و نوصل السوبرماركت و بما انه الجو كان شوي شمس شليت عن ابويه النظاره الشمسيه و لبستها..و في هللحظه في سياره واقفه على الاشارات و منزل الدريشه لمحنا جان ايقوم و يشغل المسجل و ايطول على الصوت على الاخير في هاللحظه بابا اتضايق واااايد جان ايقوم و ايحط ايده على جتفي...
اليازيه: شوه اتغار؟؟!!
محمد: ما تشووووفينه السبال شوه ايسوي..
جان يلتفت الريال صوبنا...: عم تحكي معي يا زلمه...
محمد: سود الله ذا الويه لك...جان يمسكني بابا من ايدي و يسحبني معاه من ورا السيارات الين ما وصلنا السوبرماركت..
اليازيه: آآآآآآآآآآآآآآآآآي...باباه؟؟!!! عورتني...
جان ايحط محمد ايديه على خصره: هاذا يوم ما تسمعينها الرمسه؟؟!!!
اليازيه: بسم الله انا شوه سويت؟؟!!!! تراني لابسه عباه...
محمد: خلاص انزين خلاص...يالله هاتي ترولي و حطي فيها اللي تبينه..
اليازيه: اوكي..
++ عدا الوقت بسرعه اشترينا و ردينا البيت هالمره في تاكسي لاني ما شالله عليه على قولت بابا ما خليت شي ما اشتريته..نزلنا البيت لقينا حصه و أماه يالسات فالحوش..
محمد + اليازيه : صباح الخير...
حصه + غريسه: مرحبا...
في هاللحظه سار بابا و دش داخل و سرنا نحن كلنا المطبخ و يلسنا انرتب الاغراض و انسوي ريوق خفيف..شليت العصير و مريت على حجرة بابا..لقيته يالس على الشبريه( السرير) و فارش اوراق جدامه..
اليازيه: يالله بابا الريووووق جاهز...
محمد و بتردد: لا انا مابا...برايكن انتن تريقن...
اليازيه: شوه ما تبا؟؟!!! جانك اليوم من الصبح واعي و ما كلت شي من البارحه غير هاذيج السندويجه؟!! يالله يالله قوم..تعالي هاذا عصير فرش انا مسويتنه,,,لازم اتذوق منه..
محمد: خلاص اوكي...صبيلي كوب عصير..و تريقن خذن راحتكن..
اليازيه: ناخذ راحتنا!!!!! و انته تعتقد انه راحتنا بدونك؟؟!!! اذا انته ما تريقت انا ما بتريق..اصلا اماه من الصبح يالسه تطبخلك بيض و طماط و مادري شوه يونك كنت تتريق جذيه من زمان..و فالاخير اتقول لا ماتبا؟
محمد: و الله؟؟
اليازيه و هيه تمسك ايد ابوها: هيه و الله ما يبالها حلفه عشان تدري انك غالي عندنا..
++ طلعنا انا و بابا برا فالحوش و شفت أماه و هيه ترتب الاكل على الطاوله الصغيره..كانت رافعه شعرها عن ويهها و خصل من شعرها نازله خاصه انه شعرها وايد ناعم..و مش حاطه اي ميكب عدا جلوس وردي فاتح,,لابسه قميص قطني وردي ضيق و تنوره جينز..بصراحه شكلها ما كان امنا كثر ما كان اختنا..لاحظت انه بابا طول الوقت كان ايحاول يتجاهلها..و هالشي ضايقني وايد..
محمد: وين حصيص عيل؟
اليازيه: حصوووووووووووووووووووص...يالله تعالي...باباااااه يترياج عالريوق..
طلت حصه من البلكونه اللي فوقنا مباشره و نزلت سله فيها الخبز و الفروت بحبل من فوق..
حصه: ابووووويه الغالي...اقبض السلللللللللللللله بليز...
محمد: هههههههههههه...شوه هالاختراع هاذا..و الله فكره حلوه..
حصه: ما فيني اشل الاغراض كلها من فوق ألين تحت..يالله امسكه زين لاني بنزل
محمد: اوكي..
++ تريقنا في جو من زمااااان ما عشته...كان الكل يضحك عدا باباه اللي ما شل عينه عن اماه..و اللي هيه بعد كانت بين كل لحظه و لحظه أصيدها و هيه تلمح باباه..تجاهلت كل شي في هالجو الحلو..و قررت اني اعيش هالسيره الحلوه..و اتجاهل اي شي ممكن ايكدر خاطريه..
~~~~~~~~~~~~~~~~~~~~~~~~~~~~~
في هذه الاثناء في العين و العايلة الكبيره كلها متجمعه في مزرعه العم عبيد

صبحى: يالله يالله بناااااااااااات...يالله كلكن قومن بنطبخ الغدا...
مديه: يا سلااااااااااااااااام...جواري العصر العباسي نحن؟؟!!!! نحن نطبخ الغدا و الشباب يلعبون ورقه؟؟!!! مستحيل..
صبحى: هيه نعم انتن جواري لأخوانكن..
مديه: انا و جميله ما بنقووووم...شلي ميثاني اختيه وياج,,,انا معفايه من الخدمه...مب كفايه اني آخذ صيفي و اكرف فالجامعه و تبوني بعد اخدمكم..
صبحى: حشا حشا...مهب بنت..الساع ما بيقولون عنج يعل بطن يابج الجنه..
مديه: ألين ما عرس يستوي خير..
صبحى: ايه بنااااااااااااااااااااات....جميله..حسنا...ميثاني.. عليوووه..تعالن...
ميثا: لا اله الا الله....يالله بناااااااااااااااااات نداء الاستعباااااااااااااد يناديكووووووم انطلقن..
صبحى: عنلااااااااااااتكن...بنات مزر هوووور...و كل ما قلنالكن شي قلتن استعباد و نحن خدامات...
العم عبيد: ايه انتن اليواري..ما تسمعن عمتكن صبحى تزقركن؟؟!!! شله ما تفازعنها؟؟!!!
اتجدم عبدالعزيز من المظله اللي يالسات تحتها البنات..كانت مضله مسكره من فوق و من الاطراف مفتوحه يالسات فيها البنات وتحت الغافه فارشين الشباب و حاطين التكي و المواسد و يالسين يلعبون ورقه
عبدالعزيز: اظني سمعتن امايه تزقركن..يالله نشن يالله لا اشخطكن بالعصا على ظهوركن...
شما: يالله و جاااااااااااااااااان ارتجف...
عبدالعزيز: انا ما رمستج..انا ارمس خواتي
شما: و الله كل ما يستوي شي قلتو يالله بنات قومن..بنات غسّلن..بنات خمّن..بنات شلّن..بنات طيرن..بنات نتفن كشيشكن..
عبدالعزيز: بسم الله بسم الله..اخافني ارمس الاذاعه و انا مادري...
ألتفت عبدالعزيز صوب خواته مدّيه و ميثا: يالله انتن الثنتين بتغرفن الغدا..
مدّيه: انا توني يايه من الجامعه..حشا حتا ما عقيت عباتي حملووتووني فالسياره و يبتوني المزرعه يعني انا ما روم اسوي اي شي..
عبدالعزيز: ميثا و حسنا و عليا متفرقات؟؟!!!! لا لا الدنيا مب بخير اكيد في شي مش طبيعي عم بيصير...
حسنا : و من شر حاسد اذا حسد..لا الحمدلله كل الامور على اتم ما يرام..عليا سارت داخل و بتي ألحين..
شما: عمي...
عبيد: هاه بنتيه شوه تبين؟؟!!
شما: بصراحه..انته انسان حقاني و راعي حق..قول الصدق مهب نحن اللي بس نشتغل و نكرف..حرام عليكم من ساعتين و نحن يالسين الا نخم الغبار عن هالمزرعه الاثريه..
عبيد: سودا الويه؟؟
شما: لبيه مولاي..
عبيد: ألحين يايبينج المزرعه ...عشان انفرّي عنج..دوم اتصيحين ما تطلعونا ما تطلعونا..و خلاف اتقولين هالمزرعه غبرا؟؟؟
شما: عالعموم لا نغير مسار الموضوع...عمي قول الصدق من اصبحنا اليوم و نحن نخدمهم هاذيلا زمرة الكسالى و المشردين؟؟!!!
عبيد: سودا الويه...
شما: لبيه مولاي..
عبيد: لا تقولين مولاي ما حد مولى غير الله..
شما:عممممممممممممممممممممممممممي....راده الشان فيك...
عبيد: تم..
شما: في ويه منوه؟!
عبيد: في ويهي...اطلبي بنت راشد..
شما: انه اليوم اتخلي الشباب هم اللي يطبخون و يغرفون الغدا...
عبيد: تم بنت راشد ما طلبتي..ما بتي عويناتي اليوم؟؟
شما: هيه ان شالله بيون من شويه رمست ابويه ايقول ياي و يابها وياه..
عبيد: يالله يعلني افداااها من بنت...حازت الغلا كله..
شما: و انا؟؟؟
عبيد: هيه يا غير هيه ياهل تعرفين بعد الياهل له غلا..و عقب عشر دقايق انه سيارة راشد ابو شما داخله و حولوا ايسلمون على الاهل
عبيد و بأعلى صوووت: مررررررررررررررررررررحبا...الساااااع...مرررررررررر ررحبا ملااااااااااييييين...يالله يعل دار بلاج يا مها الحرررررق..(نزلت مها بنت حاضر اللي كان شالنها يدها راشد تركض صوب العم عبيد خاصه انه مدلعنها)...فدددددديت رووووووويحتج...حبيني في ويهي..حبيني على عيوني...هيه هيه و هنيه بعد حبيني على خشمي..و البنت الصغيره حليلها ما خلت مكان ما باست عمها فيه..
مها: بس عاد عبيدااااااااااااااان...يوم اتشوووفني كل يوم اتقولي حبيني حبيني بس انته اول مره تشووفني؟؟!
عبيد: وه...!!!! سود الله ويهج..جاني من اصبحت اليوم و انا اترياج..و يوم ييتي اتقوليلي عبيدان؟؟!!!
مها و بخبث: هيه عااااااااااااد...انا قصدي ادلعك...من عويناتي اني ما قولك عبيدان مره ثانيه
عبيد: هيـــــــــــــــــــــــــه...ثرها جذيه السالفه؟؟!! اندوج عيل..و خش عبيد ورقه خمسميه في قميص مها
مها: عمي عبيداااااان
عبيد: عوووووووووووووونج...تعالي بروح ريحتج شويه..تعالي عدّنا بج من شهرين...
مها: عمي عبيداااان...أقولك استويت بخيل..انا مابا هالفلوس...ابغي هاذيج العيناويه..اللي فيها طير
راشد: عيب يا بنتيه البنت ما تيلس تطلب فلووووس...حبي عمج على راسه يوم عطاج خمسميه..
عبيد: غربلها الله من بنيه اتعرف الالف..من وين بييبلج الف الحين؟؟؟
شما: ما عليك منها عميه لا تكبر لها راسها...
عبيد: خلاص بنتيه يوم انرد البيت بعطيج ألف و سيري اشتريلج ألعاب..
شما: يالله عميه نفذ وعدك...
عبيد: شوفي بنتيه هاذيج الميعنه( المجموعه) انا ما بروم عليها بروحي..انا بشرط عليهم لاكنكن انتن البنات فازعنهن..
مدّيه: شوووه هاذا ظلم ظلم ظلم..
عبيد: ما تحت الله ضيم يا بنتيه...بس بنحط شاره و المجموعه اللي بتطبخ احسن غدا هيه اللي بتفوز اليوم
مدّيه : تم..
و قام العم عبيد و قسم الشبيبه و البنات مجموعات..بحيث كانت كل بنت مع اخوها..سارت مدّيه و ميثا مع اخوهن عبدالعزيز و أمهم صبحى عمت شما أخت راشد..و إيمان و عليا بنات العمه سلامه المتوفيه مع أخوهن علي..و العمه عوشه مع بنتها حسنا و خالد ولد العمه صبحى بحكم انه العمه عوشه عندها بنتين بس ما عندها اولاد و هيه مطلقه فسار خالد عندهن..اما جميله بنت العمه عوشه انضمت لشما بحكم انها البنت الوحيده مع اخوها محمد و مانع..و بدا الطباخ بالاحرى الحرب الاهليه..الشباب و البنات يتضاربون على الاكل و كل واحد ما يبا الثاني ايشوف هو شوه يالس يطبخ..و الفوضى كانت تعم المكان بس روح المرح ما غابت و كل مجموعه اتغايض الثانيه..
محمد: أقولج شميم حطي قوطي صلصل زياااااده..و الله طعمه بيطلع ملغ ( من دون طعم)
شما: محمدين اقوووووولك بس ايكفي ما يبا زياده..و الله عقب بيظهر مهب حلو...
محمد: اووهوووووو منـّـوووووع حسنوووه شوه الراي انزيد صلصل..
حسنا: هيه هيه شميم زيدي قوطي صلصل..
شما: بلاش تكتروا بالكلام...حسنوه روحي هاتيلنا لومي يابس..و انته مانع سر هات هاذا الملاس
محمد: شما...اقولج زيدي صلصل
شما: خلاص خلااااااااااااااااااص بسير اييب قوطي حشا يا بوكم حرقة يوف انته..
سارت شما اتييب قوطي صلصل من الكرتون...بس في لحظه لمحت انه عبدالعزيز ساير صوب نفس الكرتون جان اتقوم تركض قبله عشان تلحق عالصلصل و اتذله عليه، انتبه لها عبدالعزيز جان يركض قبلها و بحكم انه ريال شله قبلها و ما حصل غير قوطي واحد ما طاع يعطيه شما..
عبدالعزيز و هو رافع ايده و شما تناقز تبا اتشل القوطي: عزززززززووووز...بس عاد عطني اياه
عبدالعزيز: مالي خص شليته قبلج...
محمد: عبدالعزيز يا رياااااال عطها اياه..ماتسون برياني انتو؟؟؟
عبدالعزيز: عفوا الخلطه السريه
شما: بسم الله منك...هادم اللذات..من شافني بسير اشله سارله قبلي..خز عني خز
محمد: حسنا انتو شوه اتسوون؟
حسنا: للأسف برياني يعني ما عندنا صلصل..
مها و هي اتكلم محمد: عمي سيف؟
محمد: انا مهب سيف انا محمد
مها: عمي سسسسسسسسسسسسسسسسيف يالله انغني هاذيج الغنيه مالتنا
محمد: شوه هالنشبه هاي...اقولج مهب سيف انا انا .....ممممممممممحمد..عمج الشيخ محمد
مها: عمي عبيد....قووووووووووووووووله...تراني بصيح..
عبيد: بنتيه هاذا مهب سيف هاذا محمد...بو جسيم وين تويمك عيل؟؟!!!
محمد: سيف ايقول ياي فالدرب...الحين بسويله بخليه اييب صلصل وياه..ازمه الصلصل اليوم
مدّيه : خلوه اييبلنا نحن بعد بنسوي صالونه
محمد: جب انتي و حزبج الخاين
مديه: و الله من سبق لبق...خالي عبيد شوه الشاره ؟؟؟
عبيد: اللي بيفوز هو اللي بيقرر..
و بالفعل وقت الغدا وصل سيف توأم محمد من دبي ، و تجمعوا سيف و أبوه راشد و أمه موزه تحت المظله بحكم انهم هم لجنه الحكم..
عبيد: هاه الربع؟؟؟ منوه شفتوه اليوم طبيخه عدل؟؟ بو حاضر؟
راشد: البرياني اللي على لحم مهب اللي على دياي..
عبيد: و انتي يا أم حاضر..
موزه: انا اقول انه المجبوس زين بس وايد حطوله ماي..
عبيد: يعني منوه ترشحين؟
موزه: أرشح برياني الدياي..
عبدالعزيز: الحمدلله تساون الاصوات...و انته سيف؟
سيف و بكل بروده: برياني اللحم توب..
عبيد و هو نظرته على شما: و انا ارشح المجبوووس
في هاللحظه تناطروا كلهم على العم عبيد..اللي يقوله انته غشاش..و اللي ايقوله انته تدري بكل شي فما لك حق تعطي صوتك..
عبيد: لا اله الا الله لا اله الا الله، تناطرتوا جنكم اليراد..عاد انا بغيت ارفع معنويات الفريق، يحليلهم ما حد صوتلهم..و الفايز برياني اللحم..اللي هو من إعداد العمه عوشه و خالد و حسنا...ألف مبروك..الاول من غيرمنافس على الاطلاق في سباق الاصايل...الناموس...
العمه عوشه: تستحق خير و سلامه..
محمد: اصلا مجبوووسنا فنان..بس الضو كانت والله انها..مهب الين هناك..
عبدالعزيز: لا و الله؟؟!!! خلوا عنكم عنبوه ولا حد صوتلكم..بتخبركم انتو مسوين مجبوس ولا معشى الهوش سبوس و ماي؟؟!!
إيمان: حليلنا حتى نحن ولا صوت...
علي: البركه فيج انتي بنت محمد جبيتي الملح بلا قياس..
شما و باللهجه المصريه : عباااااا عزيز...
عبدالعزيز: يالله يلقع عبدالعزيز و أيامه..خير شوه تبين؟
شما: بسم الله ما تقول ولد عمتيه..اتقول بو جهل
عبدالعزيز: ما تم حد فالدنيا الحين اتشبيهني به غير بوجهل
شما : شو اسويبك؟؟ اقولك عيسى اخويه ما بيي اليوم اهنيه
سيف: شما عاد درينا انه عيسى خوج بالرضاعه..بس شوي شوي عليه من ينزل لازم ايخطف و ايسلم عليج؟؟!!! وراه اهل هو بعد...
محمد: لا تعب عمرك وياها ما تفيد فيها الرمسه، عيسى عليه زام ما بينزل مرمسنه من شوي..يالله ما طلبتو؟
العمه عوشه: عني انا ما بغيت غير سلامتكم شوفو خالد و لا حسنا شوه يبون..
خالد: انا اتنازل لبنت خالتيه حسنا
عبدالعزيز: صدق انك جبش..جبش مكسور قرونه بعد
حسنا: احم احم..بعد التشاور العميق مع بنت الخاله سلامه :عليا..و بنت الخاله صبحى: ميثا..اللي هن اعز ربيعاتي..تم التوصل الي اننا نبا حوووووووووض سباااااااااااااااااااحه
اول شي عم السكوت...عقب ثواني نقع عبدالعزيز من الضحك..و عقبه محمد و الشباب كلهم...
محمد: البقرااااات الثلاث قررن يبن حوض سباحه..ههههههههههههه
ميثا: جانا نحن بقر البركه فيكم انتوا الثيران...
عبدالعزيز: جب انتي ام لسان رضفتين...ذكريني اقصلج اياه بعدين..ئال ايه آل حوض سباحه...
شما: عباااااا عزيز
عبدالعزيز: شووووهتي اسمي يعل ما من شما فالدار..
شما: عمي عبيد تسمعه.؟؟؟

عبيد: ايه تراك انته الا عزوز..حشم عمرك
عبدالعزيز: صصصصصصصصصصصصصصبحى؟؟!!! قلت بج الاسامي اتسميني عبدالعزيز؟!! عنبوه زلمه؟؟!! بصراحه انا و ايمان بنت خالتيه يبالنا انغير اسامينا..
ايمان: لا بويه جانك متعقد من اسمك انا اسمي و راضيتبه...
العمه صبحى: شوه بلاه عاد اسم عبدالعزيز؟؟!! عاد خير الاسامي ما عبد و حمد
عبدالعزيز: عنبوه قبيلتنا بشرقها و غربها..بطولها و عرضها ما فيها واحد اسمه عبدالعزيز غيري انا!!!!
مدّيه: أحسن عشان اول ما يقولون عبدالعزيز ال.... عطول يعرفون انك انته..
عبدالعزيز: عاد افتت مفتي الجمهوريه..مديه الله يخليج اصدري مرسوم اميري يعفينا من تخرفيتج..يا أم سالم(صبحى) قلت الاسامي اتسميني هلاسم...
صبحى: بالعون يا ولديه ابا اسميك اسم غير...لكن ابوك الله يهديه ما بغى..يغايض..
عبدالعزيز: شوه امبونج بتسميني؟؟!!
العمه عوشه: بويه امبونها تبا اتسميك خالد على خالد الفيصل...و هاذاك العام يوم اتطيح انته حلف ابوك بالطلاق ان سمتك خالد....
عبدالعزيز: خخخخخخخخخخخخخخخخخخيبه...السالفه فيها طلاق...و الله مادريت انه ابويه ايغار لهدرجه..و انتي امايه تعيبين به خالد الفيصل و انتي على ذمة ريال..
صبحى:وابويه..ثرني باخذه انا خالد الفيصل؟؟!!! ريال و امير و شيخ بس عليه ابوك يوم كنت بسميك عليه..الريال بصراحه يعيبني قصيده و اسلوبه ولا هو شو اباه؟؟!! الا ابوك هذا ما فيه ذهن ...
راشد: إلا وينه ثاني اليوم؟؟!!
عبدالعزيز: و الله ابويه احيده ساير شمال ايقول ريال عازمنه..
راشد: هيه..يالله عيل المرواح المرواح...يالله جان بتسيرون...
الكل: يالله...
~~~~~~~~~~~~~~~~~~~~~~~~~~~~~~~
++ هذا اليوم الثالث إلنا اليوم فالاردن..استانسا وااااااايد اكثر عن ما كنت اتوقع..البارحه الصبح سرنا الاسواق الشعبيه و سرت معرض فني لوحده ترسم كنت اتابع اعمالها يوم كنت في بوظبي..و عقبها سرنا مدينة الألعاب صح ما كانت شي...بس استانست وااااايد خاصه انه باباه شاركني في معظم الألعاب مادري ليش حسيت بعمريه ارد سنين ورا..حسيت بعمريه بعدني ياهل و اتغلى على ابويه..اما اليوم نشينا كلنا متأخر لانه بابا عليه امتحان و ما بغينا انحسسه اننا بنمل و هو مب فاضي لنا..عقب ما رد من الامتحان لقانا انا و حصه يالسين نطبخ لانا عطينا اماه داي اوف لانها بصارحه هلكناها ريوق غدا عشا..و الحمدلله انه حصه تعرف تطبخ و يانا باباه و زاد الطين بله قام يطبخ ويانا..وشوه كانت النتيجه..الله لا يراويكم..ما كلنا شي..طلعنا باباه مطعم نتغدا و بعدينا دشينا مول و يلسنا نشتري أغراض..سارت أماه و حصه في صوب و انا باباه في صوب..يلسنا نشتري..وانا اشتري بلا قياس و باباه فديته ما قال شي الا يتبعني...
محمد: بتخبرج الزوز..
اليازيه: هلا غناتي..
محمد: لمنوه تختارين انتي كل شوي و تغيرين رايج..تراني مليت الا محل الذهب ما دانيه..
اليازيه: اشتري حق لي لي..
محمد: ألحين هالصدعه من الصبح حق الفلبينيه؟؟!!!
اليازيه: هيه لي لي تستاهل..
محمد: عنبوه جانها فلبينيه و تاخذيلها بهاي الحجيه؟؟!!! خذيلها من هالذهب الاصفر ايموتن على الشي اللي يتقرقع..
اليازيه: لا لي لي ما تحب هالاشياء..ابغي شي شوه اقولج..يعني غالي في نفس الوقت سمبل..
محمد: الله يهديج..خذيلها اي شي..
اليازيه: لا ما باخذلها اي شي..
محمد: اوووهووووو الا فلبينيه..
اليازيه: لا مب مجرد فلبينيه ...هاي يوم امرض هيه توديني المستفى..يوم احمّ هيه تسهر عليه..حتى الكونسرتس فالمدرسه هيه تحضرهن!!!!! من يوم انا ياهل و هي تحاضيني..ما تهوون عليه
محمد: انزين انزين..ريلاكس ابويه..خذيلها اللي تبينه انا فالمحل اللي عدالج..اندوج البطاقه..
اليازيه: لا باباه عندي فلوس يكفن..
محمد: فلوسج لج يوم انا مب عندج و يوم انا عندج اظني انا ملزوم مبج...اوكي؟
اليازيه: اوكي...
++ خذت حق لي لي قلب ينفتح نصين و عليه حجر فيروزي وااايد حلو..ادريبه بيعيبها..طلعت ادور باباه ما حصلته عقب شوي لمحته في محل اطفال..و ماسك قطعتين و محتار امبينهن..ييته على غفله..و بسته على جتفه من ورا..
اليازيه: بووووو...شوه اتسوي..
محمد و هو متفاجأ : انتي؟؟!!! فضحتينا...عاد الله يهديج بوسه جدام خلق الله ما خلق
اليازيه: عادي اصلا اللي تبيع حرمه...دونت وووري..
محمد: عاد هاي شدراها انج بنتيه...اخافها تفهمها غلط...
اليازيه: لا ما عليك...و ألتفتت اليازيه صوب المسؤوله عن المحل: على فكره هاذا بابا...شفت راح الالتباس..بتخبرك انته شوه اتسوي اهنيه في محل ألبسه اطفال؟؟!!!!
محمد: شوه اتشوفيني اسوي؟؟!!! يالس اغني مثلا...يالس اشتري ملابس..
اليازيه و ببراءه: لمنوه؟؟!!
محمد: لعيالي بعد لمنوه...بتخبرج شوه أحلا الكحلي ولا البني..
اليازيه و هيه تغمض عيونها: منوه عيالك..
محمد: حامد و زايد..بتخبرج شوه بلاج ما تجمعين..حامد صف اول هزرج هاللبس بيوزله ؟؟!!!
++ في هاللحظه حسيت جنه حد يخنقني...الهوا خلص ولا انا احس بضيقه نفس..حسيت بعمريه الغيره تنهشي من كل صوب..من طرا لي عياله..حسيت انه باباه مب لي..حسيت انه باباه له عياله..له عيال غيري انا و حصه..ناس غير تهمه يمكن اكثر عنا..ما همنيه عياله كبار ولا صغار..كل اللي همنيه هاذيج اللحظه مدى الكره اللي حسيتبه صوبهم..
اليازيه و بعصبيه: ما عرف ما عرف...
محمد: اوكي..بسأل البياعه هيه اتعرف بالعمر..بس فالوان شوه اخذ ولا اقولج باخذله الاثنينه..
اليازيه: باباه انا بطلع يوم تخلص ازقرني..
محمد: تعالي تعالي بعدني زيودي ما خذتله شي..تعالي انا ما عرف في اشياء اليهال وايد...
اليازيه و بصرخه مكتومه: اذا انته ما تعرف يعني انا اعرف؟؟!! شدراني باليهال انا؟؟!!! انا بطلع اوكي بطلع بسير ادورلي اي شي اشربه حاسه بعمري مدوخه..مادري حاسه بضيقه مالي بارض...
محمد: اليازيه؟؟!!!
اليازيه: باباه الله يخليك...جبدي لاعت مادري من شوه بزقرلك حصه هيه تفهم في هالامور اوكي
محمد: اوكي
++ طلعت بسرعه..ادور هوا..ابغي اتنفس ياناس..ألحين بس صدقت انه باباه له عايله ثانيه..و عالم ثاني..و دنيا ثانيه..و ان عنيناله شي في حياته فهو شي فرعي ثانوي..يا ترى نحن شوه في حياته..ادريبه قالي انتي اغلى وحده في قلبي..هيه بس انا الا بنت..كم بيدوم هالغلا..ألين ما يكبرون عياله الاولاد و ياخذون الغلا كله؟؟!! هيه يابتله اولاد..باجر بيكونون سنده في هالدنيا و انا بكون وين؟؟؟ في خبر كان؟؟!! ما حسيت الا بعمري يالسه على واحد من الكراسي..ما دقيت لحصه و لا خبرتها انه باباه يباها..شوه يعني لازم ياخذلهم شي؟؟!! مب لازم...شفت الناس متجمعين جدام كشك صغي ايبيع كابتشينو..رحت الحمام غسلت ويهي و حطيت جلوس و طلعت قلت باخذلي جذيه كابوتشينو..ماريد اشغل عمريه باي شي..ابغي انسى..ابغى هالصداع ايخف شوي..وقفت بالطابور ألين ما يا دوري...
~~~~~~~~~~~~~~~~~~~~~~~~~~~~~
في هاللحظه كان حاضر و ربيعه (صديقه) علي، يتمشون عقب ما ردوا من الدوام اللي هو عباره عن دوره ياخذونها فالصيف عشان عقبها ياخذون دوره عسكريه بحكم عملهم فالجيش عشان يترقون عقبها..
حاضر: يالله محلات الشيله و العباه....ياعرب الله ترد الروح...عفنا هالكشيش الصفر و البراطم المصبغات.
علي: بويه...حط عقلك براسك..شياك استخفيت...
حاضر: لا استخفيت ولا شياته...أم العيال ما حد يسواها فقلبي...لو مرررره...ايهبن هاذيلا..مخلفات الاسواق
علي: اشوا تحريت بعد...قلت جان الغربه سوت فعايلها فيك..
حاضر-: هب جنه مصخها راعي المحل...شوي و بيكرفها(بيحبها)؟؟؟!!!
علي: و الله الطيور على اشكالها تقع...هزرك مواطنه ام طير...ولا هشك بشك...
حاضر: الشيفه شيفه مواطنه ام طير...غيرأنه الرمسه منقعه...بعدين حاطه صوره بو خليفه على السكرين مالت التيلفون اكيد انها مواطنه..
شوي إلا مشكله ناقعه جداهم...خيبه شوه استوا؟؟؟!! قامت البنت تلعن و تشعن...و السب شال المكان..و الناس قامت تلتفت...بصراحه ريحت المشاكل فاحت من زمان من شافوا هالغرشوب جدامهم و هي تطلب الكابتشينو..
اليازيه: يالحقير....صدق لا مستحى ولا حشمه...مالت عليكم مب منكم من اللي نزل مستواه ويا بلادكم...أرف
حاضر ولا اراديا: شوي شوي انزين كلتي الريال...بويه يوم انتي اتدورينها الحشمه..حشمي عمرج قبل عشان غيرج يحشمج...
علي: ياخي شوه تباها؟؟!!! قصرت الا على السباله تورطنا وياها؟؟؟!!
حاضر: ياخي ما تشوفها شاله الدنيا بحسها...بنت البلاد هاي..جان مالقت لها والي نحن بنصلبها...
علي: بويه قم قم قم ....نش مافينا عالمصايب...جانها متمشكله ويا راعي الدكان نحن مالنا خص...
ألتفتت اليازيه صوبهم : و أنتو؟؟؟!!!! مالت على هالاشكال...صدق ناس رزه...
علي: عنلاااااتها...
حاضر:أكرم انج موواااااطنه...اتهبين...
اليازيه:مواطنه غصب عنك و عن اللي ما يرضا....لو انته مواطن جان ما رضيت على واحد زلمه يعق كلمه عليه
علي: سمحيلنا الشيخه...من شكلج...غوينا...وايد اللي يتبلن على بنات بلاديه..
اليازيه:هيه الشيخ خليتلكم اياها الوطنيه...ويا هالشورتات...
و قــّـفت اليازيه عنهم
حاضر: و الله ثم و الله لو نحن فالبلاد...يرقص في بطنها الين ما تظهر مصرانها من ذنيها...
علي: لو لو انته فالبلاد...بويه هاذيلا مالهن والي..طبك منها..ياهل...ليس على السفيه حرج...

++ و الله مادري شوه اللي ياني في هاللحظه و خلاني انقع في ويوهم..فجيت غيضي كله فيهم..و الله مهب من عوايديه أسوي مشاكل..ولا أحب اتبلى على حد..خاصه فالسوق..ولا و مع شباب مواطنين بعد..من وين ظهرولي هاذيلا..انا ناقصتنهم؟؟!!

أنتظرو قصة دانني والجرم حبه في البرت الياي


دمتم بود

بسلمووووو يا بنت البدو

على هالقصة الروووعة

والسموووحة على القصووور

تسلمييييييييييين خيتووووووو ع القصه الحلوووووووووووووووه



ونتريا يديدج

الجـــ.ـــزء الثـــ.ــالــ.ــث

++ آخر يومين لنا اهنيه فالأردن حسيت بضيقه غير طبيعيه..مالي نفس للطلعات ولا المشاوير..رغم انه الكل لاحظ عليه هالشي الا انه و الحمدلله ماحد سألني عن هالشي..مالي نفس اطلع و ايلس وياهم..يمكن انا اكبر الموضوع اكثر عن اللازم..بس و الله العظيم من يوم ما طرالي باباه عياله..و انا مب قادره اتحمل عمري..و كل ما تذكر الموضوع احسبه يكتم على نفسيه..خلاص ألحين هذا الشي واقع لا محاله منه ولا اقدر اني اتجاهله..بس فكرة انه حد ايشاركني بباباه مب قادره اتخيلها...ألين آخر لحظه كان عندي أمل انه باباه ايرد لنا..لبيته..لأماه..لحياته الاوليه..اللي الين الحين أحس بوحشه كل ما تذكرها..في هاللحظه دشت عليه حصه و الضحكه تملا ملامح ويها ذات الجمال الأسطوري..دوم اقٌول في خاطريه..ليتني خذت نص جمال حصه..حصه تقريباً نسخه مصغره عن اماه..بإستثناء انه حصه بيضا اكثر عن اماه و اللي يشوفهن عدال بعض بنفس الضحكه الملائكيه يعتقد انهن الشخص نفسه مب شخصين..اما انا..انسانه عاديه.. دايما ملامح حصه اختيه الجميله..و ملامحيه البسيطه..تثير الشك في اننا خوات!!! انا ورثت ملامح بويه الحاده..خشمه الطويل الحاد..عيونه الوطواطيات..ولون البشره القمحي..و خدودي فيهن حمره طبيعيه تقهرني من يوم انا صغيره..بس هاذي انا..انسانه عاديه الجمال..بس اللي مخلني استغرب اني دوم اجذب الطرف الاخر اكثر عن حصوه رغم انها اجمل مني..من يوم انا ياهل وين ما سير و الاولاد يتبعوني فالمدرسه..صداقاتي كلها كانت اولاد ولا لي خص فالبنات شي..و شوي شوي و انا اكبر..لاحظت انه الكل فالبدايه يلفته جمال حصه الباهر..بس مع الأحتكاك الكل ينبهر بشخصيتيه و يتحاول يتقرب مني..يالله من شخصيتيه للأسف ورثت شخصية أماه الناريه..أماه شخصيتها حااااده وااايد...و دايمن اتشوف عمرها هيه الصح و الباقي كلهم غلط..بغض النظر منو هم الباقيين..حتى لو كان هالاخر ريلها..و لأن اماه كانت آخر العنقود في عايلتها..كان ما ينرفض لها طلب..و عندها حريه في اعتقاد باباه انها حريه زياده عن اللزوم..في كل شي..في طريقه لبسها..في ستايلها..حياتها..حتى اسلوبها..كله مغلف بدلع..و هالشي كان دايما هو فتيل او الشراره اللي كانت تولع امبينهم..و عنادها الدايم لرمسه ابويه هي السبب الاساسي في انفصالهم..رغم انه اماه كانت ترجع السبب للظروف اللي كان ايمر بها باباه في هاذيج الاوقات...
حصه: يزوووووووووووووووي...بس عاااااد
اليازيه: واتس اب؟
حصه: شووووه بلاااااج...اليازيه..ظبي بوظبي...يالسه و حابسه عمرها من الصبح الين المغرب؟؟!!! مستحيل انتي اذا ما نشيتي من الساعه تسع الصبح و ربشتي الدنيا ما تكونين طبيعيه...
اليازيه: حصوه
حصه: لبيه
اليازيه: حد قالج انج رزه؟؟!!!
حصه: لا انتي اول وحده...و بعدين اذا بستـّهم على اختيه و بشوف شوه هامنها يعتبر رزه؟؟!!
اليازيه: ماشي مصدددددددعه...احس يبهتيه بتنفجر...
حصه: تعالي تحت...تعالي بسويلج جاهي..
اليازيه: مابا
حصه: يالله عااااااد...متعنيه و يايه الين فوق عشاان خاطر هالعيون
اليازيه و بصرررريخ: مااااااااااااااااااااااااااااااااااباااااااااااااا ااااااااااا...حصه بليز طلعي..
نزلت حصه راسها..و طلعت برع و هيه تمشي مشيتها اللي تكسر خاطريه..العرج في ريل حصه كان باين من اول خطوه مشتها في هالدنيا..تلومت فيها بس مالي مزاج ابدن على اي حد..دشيت الحمام و اتسبحت بماي باااارد و طلعت كان عندي امل انه هالصداع ايخف ولو لحظه بس للأسف ما شي فايده..طلعت برع الحجره ادور اماه ما حصلتها لا هيه ولا حصه..نزلت تحت كنت بمر على باباه بس قلت الريال عليه امتحانات ما فيني اضايقه..طلعت برع الحوش..و شوه لقيت..لقيت الحبيب باباه منسدح على واحد من الكراسي على الحوش و اماه يالسه مجابلتنه و يالسين يدقون سوالف..و الله دنيا..هاذيلا فالبلاد ثواني ما يتحملون بعض كل واحد ما يقهر يسمع حس الثاني..و اهنيه يالسين مجابلين بعض و لو ما عرف الوضع بينهم جان قلت يالسين يتغزلون ببعض!!!
اليازيه: مسا الخير..
محمد: مرحبا الساااااع بظبي بوظبي...هاه غناتي اشوفج مكشونه(معصبه)..
يلست عدال اماه و حطيت راسي على ريولها: لا ماشي بس مصدعه شوي..حصيص وين؟
محمد: سايره اتسويلنا يانسون على قولتها..
اليازيه: انا بسير عندها..
محمد: يلسي يلسي...ما نصبر بلاج..حصيص؟؟!!!
طلعت حصه من بلكونه المطبخ اللي تطل مباشره على القعده اللي يالسين عليها: لبيه..
محمد: لبيتي حايه..تعالي بنتيه...الجو حلو..ما خلصتي..
حصه: تعال ابويه امسك السله و انا بييب الدله ويايه..
قامت حصه بطريقتها المتطوره و نزلت السله اللي فيها الاغراض من البلكونه بحبل و تلقفها باباه و حطها على الطاوله..نزلت حصه و يابت الدله وياها حطتها..و ردت داخل بتييب فستق..نش باباه و اماه في نفس اللحظه يبون ايصبون اليانسون فالكوبات..
محمد: خليه غريسه عنج انا بصبه..
غريسه و هي تشل الدله عن محمد: لا أفا عليك..خلني انا بصبه..
محمد: لا و الله..هاتيها هاتيها..
غريسه: عنبوه بتصب علينا و نحن يلوس انطالعك؟؟!!!
++ في هاللحظه مارمت اتحمل عمريه اكثر عن جذيه..قمت ووقفت في نصهم و مرطت الدله من ايد اماه: هاتو هاتو بتيلسون اتعازمون ألين باجر و انا راسي بينفجر!!! عن اذنكم بصبلي و بسير الحجره..صبيتلي كوب و قفيت عنهم..
محمد: اليازيه!!!!
لفيت صوبه و ببروده: شو؟؟!!
محمد: شوه بلاج؟؟
اليازيه: ماشي....ماااااااااشي...لازم ايكون شي يعني؟؟!!! ما روم اسير و ايلس ارووحي شوي؟؟!!
غريسه: اليازيه!!!! شوه هالاسلوب..؟؟
اليازيه و هي خانقتنها العبره: اوكي سوري..انا بسير فوق..راسي ايعورني و مهب رايمه افج عيوني..تصبحون عخير..
طلعت فوق و انا اعد الخطوات ابا اوصل الحجره..مابا اصيح جدامهم..ركضت سكرت الباب ورايه و طحت على الشبريه اصيح بصياح..من يوم انا ياهل ما صحته..يلست اصيح بصوت عالي..مادري شوه اللي يستوي في داخليه..حاسه بوحشه غريبه..بغيت ارد البلاد..و تمنيت اني ما ظهرت ولا سافرت اصلا..سمعت صوت خطوات عالدري..حسيت انه حد ياي صوبيه..خشيت راسي فالمخده و حمدت ربي انه الليت مسكر..لانه باباه دش في هاذيج اللحظه..وقف عند الباب و بصوت هادي
محمد: اليازيه؟؟!!
اليازيه: هاه؟
محمد: شوه بلاج؟
حسيتبه يتقرب مني و ييلس عدالي عالشبريه..حط ايده على شعريه..
محمد: باباه...غناتي..انتي يوم ما تربشين الدنيا و تحتشرين تكونين مهب طبيعيه..كيف اذا انتي طول اليوم حابسه عمرج ولا ظهرتي؟؟!! نحن ماندري شوه سوينابج..بس جانه بدر منا غلط ولا زله سامحينا..
خذت نفس عميق عشان لا يحس اني كنت اصيح: لا و الله ما بلايه شي..بس بس..أأأ...أحس بعمريه تعبانه شوي
محمد: يالله انزين قومي تلبسي وبنسير المطعم..بنتعشا و بنرد..
اليازيه: مابا
محمد: لا لا ..مهب بكيفج..يالله غناتي قومي قومي بتغيرين جو..
اليازيه..ردت و خنقتني العبره ما بغيت ارد عليه..بس مارمت بيزن عليه ادريبه: لا فديتك..ابويه مابا
محمد: يالله ابويه مره وحده..عيل نحن ما بنسير بلاج..
اليازيه: لا لا...فديتك..لا تلوموني فيكم..و لله اني ما روم اسير و ان تعايزتم بسبتيه تراني بتضايق
محمد: عيل نحن ما بنسير و بنخليج اهنيه اروووحج؟؟!!!
اليازيه: باباه الدنيا امان...اطلعوا و قفلوا الباب عليه..انا برقد
محمد: لا مستحيل
اليازيه: باباه..عن خاطريه؟؟ لا تردنيه
محمد: شقايل بــ...
اليازيه: لا شقايل ولا غيره..انا برقد..و الله برقد..
محمد: متأكده؟
اليازيه: هيه متأكده..و التيلفون عندي..اذا بغيتكم بدقلكم..
محمد: اللي يريحج..
++ طلع باباه..لحفني و سكر الباب..سمعت الحشره و هم بيطلعون..سكروا الباب..في لحظتها انفجرت مره ثانيه و دخلت دوامه مالها اول ولا لها تالي من الصياح..ربع ساعه صياح متواصل..حسيت براحه غريبه..ربع ساعه ثانيه و انهم يايين..خشيت راسي تحت المخده ثواني و انه حصه داشه عليه..وقفت عالباب..سمعتها اتكلم حد..عقب دشت الحمام..بدلت و يوم انخشت عدالي عالشبريه..حسيت براحه غريبه لفيت الصوب الثاني و و أخيراً..رقدت..
بالباجر..و من الساعه تسع اتفيزرت..شبعت من الرقاد بدري..خاصه انه الجو فليل بارد و الدفا يساعدك على النوم..خذت شاور..و نزلت تحت سويتلي عصير..و طلعت الحوش..عقب دقايق انه باباه طالع و متعدل..يلس عدالي عالدري..
محمد: مادريتبج انج اهنيه ولا من زمان بنزل...
اليازيه: شصبحت...احم احم..بويه؟
محمد: بنعمه و انتي مهب اخير اليوم؟
اليازيه: لاه اليوم...عال العال...تمام و المزاج رااااااايق..
محمد: هذا اللي نباه..
اليازيه: باباه غناتي لا تحاتي..انا انسانه مزاااجيه وايد..ما بتوبل كل يوم مزاجي بشكل..تعالي قولي وين بتسير؟؟!!!
محمد: بسير امتحن لا تأخريني...
اليازيه: و الامتحان يباله كل هالعدول؟؟!!!
محمد: لا متعدل ولا شي...بس ابوج وسيم زياده عن اللزوم و انتي ما لاحظتي هالشي الا اليوم..
اليازيه: لا و الله؟؟!!! يالله الله يوفقك..
محمد: اجمعين..اقولج قولي لأمج و حصيص يتزهبن يوم بيي بنطلع بنسير اربد..لا تطبخن بناخذ غدا جاهز..
اليازيه: خلاص تمام..نترياك...
++ مر الوقت بسرعه ولا حسينابه..خاصه اننا انا و اماه و حصه مسوين دوشه فالمطبخ انسوي سندويجات و حصه اتسوي دلة جاهي احمر..خطف الوقت و ما حسينا إلا ببويه ياي من الامتحان مستانس علاخير..طلعنا على طول..مرينا على مطعم خذنالنا غدا و روحنا..و طول الدرب كان الجو ربشه..باباه مشغل المسجل و ايبس..و انا يالسه عداله و كل شوي لافه على ورا اسولف على حصه و اماه..الجو العائلي بالنسبه لي كان غريب وايد عليه..و تمنيت هالساعات اتدوم الدهر كله...تمنيت هالساعات اتكون صوره مصغره عن حياتي اليايه...ألتفت صوب باباه اللي كانت البسمه ما تفارج محياه..يالله الله يديمها من فرحه..وصلنا اربد..و تحوطنا فيها..و مر الوقت بسرعه..و ردينا العاصمه عمان مره ثانيه..تأخر الوقت علينا وايد و دخل فليل علينا و نحن بعدنا فالدرب..يدوب وصلنا عالساعه ثمان و نص..مرينا على سوبر ماركت ناخلنا اغراض نقصت علينا..نزلت اماه و حصه بسرعه..اما انا خذت وقت الين ما يلست البس بوتي و اربطه..يلس معايه باباه فالسياره يترياني..يوم توني اربط البوت الثاني دق تيلفون باباه..لمحت انه كان متردد انه يرد عليه جدامي بس البسمه و الفرحه المرسومه على ملامحه خلت الفضول يجتلني عشان اعرف منوه هالشخص اللي يرسم هالابتسامه الغريبه على ويه ابويه بهالطريقه؟؟!!! اتعمدت اني اتأخر عشان احرجه و يرد على الاتصال جدامي..بالفعل تململ ابويه فاضطر انه ايرد جدامي..
محمد: الوه...مرحبا الساااااااااع...مرحبا ملايين ولا يسدن في ذمتيه...شحالك الغالي؟؟!!..هيه..الحمدلله شحال ماماتك..و خوك؟؟...و الله...يا بعدي بعداه جذيه اباك..كل مره اتييب علامات زينه بشتريلك هديه...هيه هيه اشتريتلك وااايد هدايا لك و لخوك...هههههههه...هيه بعد لماماتك..وينها هيه؟؟
و نش ابويه في هاللحظه و طلع و يلس على السياره من جدام..و ملامح ويهه ما توصف شي كثر ما توصف فرحته و اشتياقه..بدا صوته الضعيف يوصلي شوي شوي..
محمد: الحمدلله تمام...شحالج انتي؟؟!! لاه؟؟ عيل انا اكثر...يالله كمن يوم و بكون عندكم....لا لا لا تحاتين..اقول عيوني...
++في هاللحظه ادركت بس مجرد الادراك انه كان ايكلم حرمته..ام عياله..فطيموه..اللي يابتله اولاد..كمن يوم و بكون عندكم؟؟!! يالله لهدرجه ايشوف الايام اللي قضيناها معاه اهنيه بفرح؟؟!!! كمن يوم بس؟!!! ما صدق ايكلمها و يسمع صوتها عشان ينجلب تماماً..انا اول مره اشوف ابويه مستانس من الخاطر لهدرجه..و يتفدا و يدلع؟؟!!..لهدرجه غاليه عنده؟؟!! لدرجه انه يزرقها عيوني؟؟!! عيل ليش يجذب عليه؟؟!! ليش ايقولي اني انا..انا و بس عيونه المركبه؟؟!!! شوه نحن بالنسبه له؟؟!! هاه؟؟!! شوه؟؟!!
لف ابويه الصوب الثاني و دش السوبرماركت ولا عباله اني موجوده فالسياره..من الصبح يالس يترياني..و الحين شوه؟؟!! من كلمها...نسته الدنيا و ما فيها..ولا كأني من شوي يالسه فالسياره و هو يالس يترياني عشان انسير مع بعض..اصلا هو نسا وجودي تماماً..حسيت بغيره في حياتي كلها ما حسيتبها..في هاذيج اللحظه تمنيت لو ازغدها من حلجها و اهوس عليه الين ما تطلع روحها على ايديه...اكرهها و الله العظيم اكرهها..نزلت بسرعه..سكرت السياره بالمفتاح ما ينلام ما خلت فيه مخ عشان ايسكر السياره لا تنسرق..و نزلت بسرعه وراه..يلست ادورهم ما حصلتهم..لقيت اماه يالسه جدام الكاونتر مال الجبن الفرش يالسه تشتري..بس ما حصلت لا ابويه ولاحصه..رحت ادورهم لقيت ابويه واقف عدالها و حصه يالسه ترمس فالتيلفون و يالسه تضحك..سرت بسرعه صوبهم..
اليازيه: باباه..حصه منوه ترمس؟؟
محمد و هو يرفع حواجبه و يالس يقرا علبه بين ايديه: ليش؟؟!!
اليازيه: بس...يعني شوه فيها اذا عرفت هاه؟؟!!! ولا هاي اسرار بعد؟؟!!
محمد: لا اسرار ولا شي..حصه ترمس فاطمه..
اليازيه: منو هاي فاطمه بعد..
محمد: فاطمه علي...زوجه محمد خليفه ال.... اللي هو ابوج..ام عياله يعني منوه مثلاً؟؟!!!
اليازيه و بضيقه نفس: اها؟!!! انا...انا...مادري,,انا بسير عند اماه..
محمد: ليش ما بترمسين فاطمه..بتسلم عليج...
اليازيه: انا؟؟!!! تباني اكلم عديلة اماه؟؟!!! ليش شوه قالولك عديمة احساس شرات هالعريا بنتك؟!؟!
قبض محمد اليازيه و هو يتكلم من بين ضروسه و يكتم الغيض: لا تكلميني بهالاسلوب فاهمه؟؟!!! ولا تراه و الله ثم و الله لي تصرف ثاني معاج...
اليازيه: شوووووو؟؟!!! شوه بتسوي يعني..باباه فج ايدي ولا اصيح الحين جدام العالم و الناس..
محمد: صيحي بشوفج...صيحي...يزووووي..حركات الدلع الزايد انا ما دانيها..فاهمه؟؟
اليازيه: فااااهمه...بس فج ايدي تراك عورتنيه؟؟!!
++ خمس دقايق حاسبنا و طلعنا..الكل يضحك و يسولف الا انا فيه حقد لو يوزع عالعالم كله بينسفه..إلتزمت الصمت..مالي حيله..حبيت اهدي الوضع و من نوصل البيت لي كلام ثاني مع حصيص الخبله..ما حسيت بلحظه كرهه تجاهها مثل هالمره..شوه هالانسانه بقره..ولا عديمه احساس..ترمس عديلة اماه بكل برود..لا و تضحك معاها بعد..ما عليه بس انا لي كلام ثاني معاها يوم بنرد الفله..خطفوا على مطعم..نزل باباه فالبدايه عشان ايجيك اذا فيه طاوله فاضيه ولا لا ...بعدين دق لأماه تيلفون و نزلو..
حصه: يالله الزوز ما بتنزلين؟؟
اليازيه و هيه تنسدح على طرف الكرسي: لا انا جبدي لايعه..مالي نفس عالعيشه..تعشوا و انا بترياكم
حصه: شوه؟؟!! شوه بتتريينا فالسياره الين ما نخلص عشا؟؟!!
اليازيه: هيه ما فهمتي ولا تبين حد ايفهمج؟؟!!
غريسه: اليازيه غناتي شوه بلاج؟؟؟ حد زعلج ولا قالج شي...
اليازيه: لا....لاااااااااااااااااااااااااااااا...ما تفهمون...قلتلكم ما باااااا...
غريسه: انا بسير اشوف ابوج
اليازيه: هيه هيه..سيري قوليله يضربني...ولا يسحبني من كشتيه جدام خلق الله ما خلق لاني ما سمعت كلامج
غريسه: انتي قواتج العالم كلها في مخج هالعنيد هذا..
اول ما سارت اماه دخلت حصه السياره و يلست عدالي و حطت ايدها على جتفي
حصه: يزووي شوه بلاج؟؟ و اختصري بليز لاني يوووعانه
اليازيه: عيل اصطفلي و سيري عند امج و بوج و تعشي و انا بترياكم اهنيه
حصه: اووووووف...في حياتيه كلها ما شفت حد عنيد شراتج...يزووي انا بييبلج الموضوع من نهايته..شله معصبه من ابويه..
اليازيه: يااااسلاااااام...اسمعه يتفدا ام عياله جدامي ولا تبيني اقول شي.؟؟!! ولا انتي حضرتج بكل برود اعصاب اترمسينها و تسولفين وياها...شوه انتي ما عندج احساس ما عندج دم..انتي شقايل اتحبينها؟؟!!!
حصه: اليازيه..علاقتيه مع حرمة ابويه..ماحد له خص فيها..فاطمه انسانه مالها دخل فينا..و اذا كانت علاقتيه بها زينه انتي مهب ملزووومه اتكون علاقتج وياها زينه..بس اكفينا خيرج و شرج..
اليازيه: شوه يعني؟؟ بتمين وياها..اترمسينها؟؟!! انتي اصلا تدرين لو اماه تعرف انج تكلمينها بهالطريقه شوه بتقول؟؟!!
حصه: اماه تدري بكل شي..و تدري اني ارمسها بين كل فتره و فتره ولا بعد تدري اني ازورها فالبيت..و هالشي مهب عايبنها..بس انا انسانه عاقله و شوري في راسي مهب محتايه حد ينصحني دامني ما سويت شي منقود..يالله قومي بتحولين يالله
اليازيه: ماابا
حصه: كيفج..عدالج ثلاث يدران دقي راسج في اقرب واحد فيهم..باي
ثواني اول ما اختفى زول حصه..ما حسيت الا بالدموع مخرسه ويهي..ياربي شوه هالحاله..مهب عايبني وضع حصه..لا و تقهر بعد..يون انتي شوه ايخصج؟؟!! كيف ما يخصنيه..انا يالسه اهنيه و القهر و الغيره بتذبحني و هيه يالسه اهنالك اترمسها بكل برود اعصاب..ما حسيبت الا بإيد تمسح دموع..رفعت عيوني بخوف..لقيت ابويه يالسه عدالي..
محمد: اليازي غناتي شوه ايصيحج؟
اليازيه: لا تقول غناتي...و انا ما اعنيلك شي؟؟!!
محمد و بتنهيده طويله..عقبها ضمني لصدره في هاللحظه صحت صياح كان مكتوم في خاطريه من زمان..من ايام ما كنت اشوف ابويه و اماه يتنازعون و يتواقعون جدامنا.زمن هاذيج الايام اللي ادركت فيهن انه طلعت ابويه من البيت ما بيكون عقبها رجعه...صحت بدموعي بس بدون صوت ما حبيت ابين ضعيفه جدامه..
محمد: شوفي اليازيه..انا ادريبج انج حرصانه من ساعة ما رمست فاطمه..بس رضيتي ولا لا ..هاي ام عياليه..و حرمتيه و ستريه..سواء رضيتي بهالشي ولا لا..حقيقه ولازم تعرفينها..و ترضيبها بعد..
اليازيه: لا مهب لازم...عيل ليش تجذب عليه و اتقولي اني عيونك؟؟!!! هاه.؟؟!! ليش اتقول اني روحك؟؟
محمد: لا ما جذبت...و انتي روحيه..و انتي اتعرفين هالشي من يوم انتي ياهل..و حصوه اختج اتعرف بهالشي..اكثر عنج..لأني ميزت امبينكن..و اتعرف انج حزتي الغلا اللي قلبي كله..و هاذيه خويتج..ما قالت شي..و اذا كنتي انتي عيني اليمين فتراه فاطمه عيني اليسار..و ام عياليه ولا لي بد منها...
اليازيه: شوه يعني؟؟
محمد: يعني انج اتقومين و تغسلين ويهج..و اتعشين ويانا..و الشي اللي فبالج اباج تنسينه لانه صعب يتحقق..انا عايش و مرتاح مع فاطمه..ولا افكر اني ارد لغريسه..ولا لبيتكم..بس بتمن انتن بناتي و تاج راسي و غلاتكن في قلبي من غلات حامد و زايد و زود بعد..
++ مسكني ابويه من ايديه و طلعني وياه و دخلنا المطعم..كان يسحبني اكثر من اني كنت امشي..كلامه حتى لو كان الحقيقه اللي لازم ارضى بها..كانت طعنه في فوادي.." انا ما فكر ارد لبيتكم" طعنه حاره و قاسيه كانت اقوى من اني اتحملها..يلست عالطاوله معاهم..تجاهلت كل شي..حاولت اضحك..اسولف..ارد اليازيه الأوليه..لانه الحقيقه الي قالي اياه ابويه اكبر من اني اتحملها..و اكيد انها شي مش حقيقي و بيزول بسرعه..اصلا مستحيل اللي ايشوف نظراته لاماه..كل شوي و حط ايده ورا كرسيها..سوالفه اللي ما تخلص مع حصه..نظره الحب اللي في عينه كل ما رفعها ليه..مستحيل انه كل هاذا ما يعنيله شي..اصلا كفايه انه ما طلق اماه..هذا اكبر دليل..على انه كل الرفض اللي يبديه ابويه تجاه ردته النا..ما هو الا سد ضعيف بينهار لو ضغطنا عليه..
~~~~~~~~~~~~~~~~~~~~~~~~~~~~~

في هذه الاثناء..في مطعم وسط العاصمه عمان
حاضر: بتخبركم وين سار بو حسن؟
عتيج: علي سار شوي و بيرد جنه ياه اتصال من البلاد..
حاضر: وين سار صوب البوفيه..و لا ينوب؟
عتيج: و الله شكله ميّح ينوب..
نش حاضر اللي كان ياي متأخر على العشا عن الطاوله اللي يلوس عليها ربعه..و ظهر ايدور علي لانه يباه بشي ضروري..طلع على طرف المطعم..ما حصله..فظهر شوي على باب المطعم لقا علي يالس على الدري اللي يوصل للمطعم ولاف شال على رقبته و يالس يرمس فالموبايل و مندمج علاخير..
حاضر: رب ما من شر؟
علي و ملامح الكآبه على ويهه: الشر ما ييك...ارمس الاهل..
حاضر: و علومهم...؟؟
علي: طيبه..الا هالعيوز لعوزتنيه..
حاضر: بشوه؟
علي و بتأفف: اتخبر متى برد البلاد..
حاضر: يا حليلها...خاف ربك فيها..بويه علي انزل هالويكند عند اهلك..و رد خاف الله في مويمتك
علي: ليتها على جذيه...تباني ارد بسرعه تبانا نملج...
حاضر و بضحكه: هههههههههه...قول جذيه من الصبح..و انا اشوف الريال مويم و حالته حاله ثره طاري العرس لعبك لعبه...
علي: حاضر..من ألحين اقولك لا لي بارض عليك ولا على مصخرتك..تراك من تستلمنا ما تفج..
حاضر: افا...هاذا و انا خويك اتقول جذيه..عيل الله يعلم شوه اتقول فمقفايه..
علي: حاضر بالله عليك لا تيلس تلوم بي..مالي باااااااااااارض..مالي بارض..
حاضر: بو حسن...ما يرزا عليك طاري العرس جلبلك مزاجك
علي: ياخي عرس ولا ابا اعرس..ولا ريت حيله اتفجج بها من هالنشبه اللي انتشبت بها..
حاضر: ياخي قولهم عرس ولا بعرس..و البنت و ما باها
علي: يييه يييه...اتحراها انته الا هينه..
حاضر: بنت عمك و من لحمك و دمك..ولا حد بيوزلك غيرها...و طيش الشباب اللي انته حالبه طبك منه
علي: ياخي انا انسان لعااااااب..ولا اريد استقر..و جان البنت امبونها محيره لخويه ولا بغاها انا مهب ملزوم بها..دبسوووني بها..يعلها النفاد
حاضر: بوحسن...الرمسه هاذي عد هالمره لا تيبها علسانك..هاي بنت عمك..تاج راسك..ولو مره ما رغبت فيها..تحطها في عيونك و على راسك من فوق..لو مره تاخذها و لا تقربها ولا انك تخليها اتلته..البنت مالها ذنب جان اخوك نطبها..و مهب الحين اتقول انك ما تباها لمنوه بتخليها للغريب؟؟
علي: حاضر..انا ريال شوري في راسي...ريال هواوي..مهب مال إلتزام..و بيت و عايله..مهب معناها انك انته مستقر و يبت عيال في هالسن اني انا لازم استقر..
حاضر: و الله يا خويه..هاي حياتك و انته حر فيها..من بغيت اتعرس ولا من بغيت تم عزابي..ياغير ما توقعت منك انك تلعوز بنت عمك و تنشبها هياك..فكر فالموضوع زين..و باجر العرب ما بترحمها كل يوم واحد منكم متعذر عنها...لمنوه بترخصونها عقب ما حيرتوها انته و خوك كل هالسنين..اقولك..قم قم تراااني ميت من اليوووع ياووووويلي عالمنسف
علي: ياويلي عليك انته تضرب بالخمس..ولا تزيد كيلو
حاضر: اهب هباك الله...رد الشهاده
علي: و الله..امره ما يأثر فيك شي..
حاضر و هو يمسك ايد علي و ايردها ورا ظهره و هو يسولف وياه: بترد الشهاده لا اخش خشمك هالسليل في هالسماد اللي وراك..
علي: ما تروم
حاضر:ماروم اوكي..بنشوف منوه اللي مايروم..
+++ و في وسط جو الضحك اللي كان يحاول حاضر انه يعيش علي فيه ساروا داخل عشان يتعشون..و هم داخلين داخل شاءت الصدفه انه نفس البنت اللي شافوها هاذيج المره فالمول و تواقعوا معاها جدام كشك الكوفي مرت من جدامهم..بس من دون لا تشوفهم او حتى تلمحهم..كانت ماشية و منزلة راسها..ماشية و ابتسامة القهر المرسومه على ثمها اتزيدها حلاه و جاذبيه..هاذي الجملة الوحيده اللي كانت اترن في ذهن حاضر و هو ايشوفها اتمر جدامه من دون حتى لا ترفع عينه صوبها..مرت بهدوء شرات نسمه الهوا اللي تحرك خصلة شعرها الاسود على ويهها من دن لا تهتهم حتى انها ترفعها..حس بأنه فواده انجذب صوبها بطريقه مهب طبيعيه..و في نفس اللحظه حس بقهر انه هاذي اللي ما تسوا سوت به جذيه و هو اللي عمره ما هزته بنت من خذ شوقه وديمه بنت خاله!!!
يلس حاضر بين ربعه اللي كانوا شالين الدنيا بأصواتهم و حسوسهم و سوالفهم..و هو جسد من غير روح..يالله شوه اللي احسبه؟؟!! هاه...شوه يا حاضر..و ليش همتك هالبنت لهدرجه..ولا شي..هالبنت ولا شي..مجرد بنت من بلادك شفتها عقب ما انقطعت عن بلادك اكثر من شهرين و استوا موقف وياها..اكيد انها ما بتمر مرور الكرام..و بيعلق جزء من الموقف اللي صار امبينكم في مخك..بس..ولا شوه اتحرا انته؟؟!! شوه بتعنيك شي؟؟!! اتهبي الا هيه...وحده خامه..مالها والي..اتسوي مشكله مع رياييل شوه اتريا منها يعني؟؟!! اتأفف حاضر و قام من على العشا يبا يغسل ايديه..و هو راد من التواليت انه خويه علي ياي صوبه..
حاضر: بوحسن..عندك صلب زقارا؟
علي: نعم عنديه..تباه حق حد؟
حاضر: اوهوووو...ياخي عندك ولا لا ؟؟؟ بتذلنا يعني؟؟!!
علي: ما عاش من ذلك بوالريم..ياغير ما حيدك اتدوخ..و الدواخه عدك بها من سنين...
حاضر: ياهاذي من سنت..تحقيق هو؟؟!!
علي: اندوك بويه اندوك...حشا ما حد ايّر النصخ جدامك..شياك رب ما من شر؟؟!!
حاضر: ماشي..ماشي..آنس ضيقه في فواديه..ولا تقوليه من شوه..مادري اروووحي مادري...
علي: انزين انزين..انسير هناك عند الربع...
حاضر: مالي بارض..بيلس اهنيه شويه و بلحقكم خلاف...
علي: انا بيلس عندك مالي بارض على صدعه عتيج يا بويه هاذا من يفج حلجه ما يصكت...

+++ تم حاضر ساير راد ساير راد و هو ايدوخ الزقارا بعصبيه شديده..شفط من الزقارا شفطه حس عقبها انه النصخ عنده بدا ايضيق..عنبوه يا حاضر ما يرزا كل هاذا اللي اتسويه بعمرك..معقولة شوفت البنت مره ثانيه و هي تخطف جدامه بكل تجاهل اتثير فيه كل هالتناقض..هيه تناقض..في لحظه ايحس انه يحتقرها..و في نفس اللحظه ايشوف انه مب قادر انه يظهر من هالمكان اللي هيه فيه..ليش؟؟ لانه ببساطه يبا ايشوفها مره ثانيه!!
و بالفعل هاذا اللي استوا لانه وهو راد ييلس فالطاوله مع ربعه لمحها..هيه ما غيرها..يالس على طرف الطاوله اللي مجابلتنه..يالسه و تضحك بكل دلع..يالقهر..الدلع..هالشي اللي يميز هالبنيه..يقرصه في فواده في كل مره ايشوفها..معقوله في بنيه طول الوقت تروم تتصنع الدلع؟؟!! في لحظه حس انه يتمنا بس يتمنا لو يحط ايديه على حلجها و يزر عليهن الين ما تظهر الروح بين ايديه...بس لا غير..رغبه غريبه صح؟؟!!
حاضر كان واقف و ينقع صبوعه بعصبيه ما كان اي حد من ربعه يقدر يلمحها عليه..حاضر دايمن كان شخص بارد الاعصاب و شي نادر انك اتشوفه معصب!!
علي: اقولك حاضر..انا بسير شي في خاطرك؟؟
حاضر: هاذيه هاذيه..و الله انها هيه و الله...اقول علي علي شوف شوف و الله انها شافتنيه؟؟!!
علي: شوه هيه؟؟ هاه ؟؟
حاضر: اووهووو..شوف شوف..
في لحظه لف علي عينه على نفس المكان اللي كان ايشد نظر حاضر بصوره مهب طبيعيه..و كانت مجرد بنيه يالسه مع اهلها على طاوله المطعم و يالسه اتسولف معاهم!!
علي: شو؟؟ شوه بلاها...
حاضر: مهب هيه نفس البنت اللي شفناها في الكوفي من يومين فالمول؟
علي: هـــــــــــــــــــــــــــــــــــيه..شوه يعني تبا تأدبها؟؟!! و الله حاله
حاضر: مادري..شوف شوف شافتنا و الله العظيم و اتخلي عمرها ما شافتنا..خس الله ذا الشيفه لها..
علي: عيل شوه تباها..انسير انسير عنها..ياخي شوف حد من هلها عندها مهب حلوه تيلس اتسبر للبنت جدامهم..
حاضر: لا سبرت و الله قاله...تخسي منوه هيه يعني عشان ايلس احاتيها؟؟!!!
علي: عيل عين من الله خير و انسير ورانا دوام باجر و نشه من فير الله...
حاضر: هزرك منوه اللي يالس عندها هاه؟؟ من هلها و لا حد من ربعها هالرغيد؟؟!!!
علي: شوه قالوك دائره الجنسيه و الهجره..شدرانيه بها انا..خيبه شوف شوف يانا يانا..نش الريال صوبنا جان ما قالتله..يوم اقولك يا ريال طبك طبك منها..عاد الحينه شوه بيفججك منهم هاه؟.؟!!! و الله أنه ياي مصرّد صوبنا..
حاضر: شوه يعني هاه؟؟ خله ايي..

ثواني بلمح البصر كان الريال اللي يالس مع البنت على نفس الطاوله يمر من جدامهم من دون حتى لا يلمحهم، الريال كان ساير صوب التواليت و حاط السماعه مالت التيلفون في ذنه و شكله كان مندمج عالأخير و بكل جديه كان يتكلم..من الصدمة اللي حسبها كل من علي و حاضر كان كل واحد منهم فاج ثمه و يطالع الثاني.
علي: مهب جنه...
حاضر: محمد بن خليفه؟؟!! عيل و الله انها بنته؟؟!!!
علي: شوووو؟؟!!! هاي الخامه بنت محمد بن خليفه؟؟!!
حاضر: والله انها فوتو كوبي منه شوف الخشم و العين؟؟!!! عندك شك يعني؟؟!!
علي: لو محمد بن خليفه و هاذي بنته و هاذي سواياها جان من زمان قده حاط ريله على رقبتها و جاتنلها..
حاضر: إييك الشور..ألحين بنعرف..
علي و هو يقبض حاضر من ايده: يا ريااااال عين خير..مالك و مال البنت..و ان كانت بنته يعني شوه بتسوي..بتواشي عليها مثلا ً و لا بتقوله حشم بنتك تراك ما عرفت تربيها؟؟!!!
حاضر: الحين ابا اعرف و بس بنته ولا لا ؟؟!!!

+++ مشى حاضر بدون احساس صوب التواليت و دش يونه ما يدري بشي وقف عدال الريال اللي كان يتغسل عالمغسله ووقف عداله يونه مايدري..تغسل و ألتفت صوب الريال و هو يطلب منه الكلينكس..
حاضر: لو سمحت الشيخ بغيت الكلينكس اللي عدالك؟؟َ
قام الريال و التفت صوب حاضر و عطاه كرتون الكلينكس...
حاضر: مرحبا الساااااع...محمد بن خليفه؟؟!!
محمد: هيه نعم منوه الريال؟
حاضر: حاضر بن راشد ال.....
محمد: مرحبا الساااااع..و توايهو الرياييل...شحالك و شحال بوك و عبيد و بنات سالم كلهن صبحى و عوشه وشيخة...
حاضر: بخير يعلك الخير...كلهم بخير و سهاله..ما شالله من متى انته اهنيه..؟؟
محمد: و الله الا من حول اسبوع باجي امتحاناات النهائي..و يبت الاهل هيايه...
حاضر: هيه...و الله ما دريبنابك انك الا فالدار..
محمد : ما تقصر..ياغير انا مهب مطول الاهل يبون لبنان قلتلهم يومين بمتحن و خلاف بوصلكم..
حاضر: هيه لبنان في هالجو اترد الروح..نحن بعد معزمين ويا الربع انسير لبنان..
محمد: لا و الله متى بتسيرون؟
حاضر و بإرتباك: ألين ألحين ما قررنا بنتشاور قبل و ياالربع بنشوف منوه بيرد البلاد و منوه بيخاوينا..و انتو متى حجزكم؟
محمد: بالأثنين ان شالله..
حاضر: موافجين خير ان شالله..
محمد: اجمعين...يالله شي فالخاطر من صوبنا؟؟
حاضر: لا و الله سلامتك الشيخ..يا غير باجر غداك عندنا...
محمد: لا تعبل على عمرك يا ريال..و هو الا باجر و بنسير
حاضر: لا عباله ولا غيره الغدا باجر عندكم..و هاذا الا الواجب..
محمد: ما تقصر يا بوراشد..
حاضر: طولي بعمرك يالله السموحه بسير ألحق على الربع جان ما يسيرون و ايخلونيه بلا سياره..
محمد: بحفظ الله..و رد السلام على ربعك كلهم..و على هلك و تواليك
حاضر: سلامن يبلغ..فمان الله
محمد : الله يحفظك..

+++ ظهر حاضر و بسمه خبيثه مرسومه على ويهه..يلس بين ربعه و هو منشرح البال بس تفكيره كان غايب عنهم..علي و هو يوخي على حاضر و يصاصره..
علي: هاه؟؟
حاضر: شوه؟
علي: اللي بالي بالك..
حاضر: ما يخصك..
علي: أفا ألحين استوينا ما يخصينه؟!!!
حاضر: شوه تبا بالضبط يعني..؟؟؟
علي: ابا اعرف؟؟
حاضر: عن؟
علي: بويه تراك مذله و مهب منك مني انا اللي مخاونك و حاطنك على راسيه؟؟
حاضر: و منوه قالك اتحطنيه على راسك..حطنيه على الكاب مالك..أخف..
علي: يا لوعت الجبد..
حاضر: علي...البنت من صوبيه..و اذا كان قصدك انها بنت محمد بن خليفه..هيه بنته...
علي وبصوت عالي خلى كل اللي يالسين على الطاوله يلتفتون صوبه: شوه يعني من صوبك؟!!!!
حاضر و بصوت تهديد لعلي: شوه يعني؟؟
علي و بهدوء متصنع: البنت بنت الريال..و انته اتعرفه ابوها؟؟!! شوه يعني بتحطها في بالك؟؟
حاضر: خلاص الا قول حطيتها..
علي: عنبوه انته ما تحشم من ابوها؟؟؟ لو بعدك ما تعرفه..؟؟!!!
حاضر: و انا شوه قلت؟؟!! قلتلك حطيتها في بالي لا اكثر ولا اقل...لا تشطح انته و تخرفت من عندك..
علي: كيفك يا بويه..حاضر انا اعرفك زين..ولا تظهر منك الزله..ياغير بغيت اقولك بس..البنت بنت عرب وراها رياييل و ما في داعي للفضايح..و انته وراك حرمه و عيال..طبك من البنت..هاذي ياهل ولا عليها لوم يا غير انته ريال و عليك لوم..
حاضر و باستهزاء: هه...يون عليك لوم..لا بويه لا عليه لوم ولا غيره..انا ريال ولا يعيبنيه شي..و هيه بنت يا ايي من وراها حشمه و ستر يا سواد ويه..و انا في كل الحالتين ما عليه لوم..

أن شاء الله هالجزاء ينال أعجابكم

أنتضرو قصة دانني والجرم حبه
في الجزاء الرابع



ودمتم بود

مشكووووووووووووووووور خيووووووووووووووو ولا هنتــ حبوب ^_^

يسلمووو بس أنا خيتوو مب خيووو

مشكوووووووووووووره خيتووووووووو ولاهنتيـ حبوبه ^_^